गाजामा हिंसा रोक्न २७ मुलुकको आग्रह, इजरायली कदमप्रति गम्भीर चिन्ता

लण्डन । गाजामा जारी इजरायली सैन्य कारबाहीप्रति विश्वभरका मुलुकहरूको चिन्ता गहिरिँदै गएको छ । बेलायतसहित २७ देशले संयुक्त विज्ञप्ति जारी गर्दै तत्काल युद्ध अन्त्य गर्न आह्वान गरेका छन् ।

सार्वजनिक विज्ञप्तिमा मानवीय सहायता अवरुद्ध पारिएको, नागरिक हत्या र आधारभूत सेवा अभावको गम्भीर अवस्थाबारे उल्लेख गरिएको छ । इजरायलले राहत वितरणमा अवरोध पुर्‍याएको र नागरिकलाई लक्षित गर्दै आक्रमण गरेको आरोप लगाउँदै ती देशहरूले आपत्ति जनाएका छन् ।

हमास नियन्त्रित गाजाको स्वास्थ्य मन्त्रालयका अनुसार पछिल्लो सातादेखि भएका आक्रमणमा १०९ जना मारिएका छन् भने कुपोषणका कारण कम्तीमा १९ जनाले ज्यान गुमाएका छन् । मन्त्रालयले इजरायलमाथि युद्ध विराम गर्न नचाहेको, झूटा प्रचार गर्ने र नागरिक लक्षित आक्रमण बढाएको आरोपसमेत लगाएको छ ।

विज्ञप्तिमा बेलायत, अस्ट्रेलिया, क्यानडा, फ्रान्स, इटाली, जापान, न्युजिल्यान्ड र स्वीजरल्यान्डजस्ता राष्ट्रको सहभागिता रहेको छ । उनीहरूले राहतको प्रतीक्षामा रहेका गाजाका बासिन्दामध्ये एकैपटक आठ सयभन्दा बढीको ज्यान गएको घटनालाई अत्यन्त दुःखद भन्दै युद्धको रणनीति पुनर्विचार गर्न आग्रह गरेका छन् ।

यी देशहरूले पानी, खाना र स्वास्थ्य सुविधाको चरम अभाव गाजामा देखिएको भन्दै इजरायललाई अन्तर्राष्ट्रिय मानवीय कानुनको सम्मान गर्न चेतावनी दिएका छन् ।