तेलुगु हास्य अभिनेता फिश वेङ्कटको ५३ वर्षको उमेरमा निधन

काठमाडौं । तेलुगु फिल्म क्षेत्रमा लामो समयदेखि सक्रिय हास्य अभिनेता फिश वेङ्कटको निधन भएको छ । वास्तविक नाम वेङ्कट राज रहेका उनको शुक्रबार हैदराबादको एक निजी अस्पतालमा ५३ वर्षको उमेरमा उपचारका क्रममा निधन भएको हो ।

उनी मिर्गौलासम्बन्धी जटिल रोगबाट पीडित थिए र पछिल्लो केही समयदेखि स्वास्थ्य अवस्था गम्भीर बन्दै गएको थियो । भेन्टिलेटरमा राखेर डायलसिस गरिए पनि सुधार नआएपछि उनको मृत्यु भएको चिकित्सकहरूले जनाएका छन् ।

चिकित्सकका अनुसार वेङ्कटको ज्यान बचाउन किड्नी ट्रान्सप्लान्ट अत्यावश्यक थियो । अनुमानित ५० लाख रुपैयाँ खर्च लाग्ने उक्त शल्यक्रियाका लागि परिवारले सहयोग संकलन अभियान थालेको थियो । उनकी छोरी श्रावन्तीमार्फत गरिएको आर्थिक सहयोगको आग्रहपछि केही मिडियामा अभिनेता प्रभासले सहयोग गरेको खबर आएको थियो, तर परिवारले ती खबरहरू झूटा भएको भन्दै खण्डन गरेको थियो ।

यद्यपि अभिनेता पवन कल्याणले दुई लाख रुपैयाँ, अभिनेता विश्वक सेन र तेलंगानाका एक मन्त्रीले आ–आफ्नो तर्फबाट आर्थिक सहयोग गरेका थिए । तर, मिर्गौला उपलब्ध नभएपछि समयमै उपचार हुन नसक्दा वेङ्कटको ज्यान जोगाउन सकिएन ।

फिल्मी करियरको सुरुवात स्वर्गीय निर्देशक दासारी नारायण रावद्वारा निर्देशित ‘सम्मक्का सरक्का’ फिल्मबाट गरेका वेङ्कटले १०० भन्दा बढी तेलुगु चलचित्रहरूमा अभिनय गरेका थिए । ‘खुशी’, ‘बन्नी’, ‘अधुरस’, ‘गब्बर सिंह’, ‘डिजे टिल्लु’, ‘स्लम डग हजबन्ड’, ‘कफी विथ अ किलर’ जस्ता चर्चित फिल्महरूमा उनले दर्शकलाई हसाँउदै आफ्नो छुट्टै पहिचान बनाएका थिए ।

उनको असामयिक निधनले तेलुगु फिल्म उद्योगमा शोकको लहर छाएको छ ।