तीन दिनसम्म नदीहरूमा बहाव उच्च हुने सम्भावना, बाढीको जोखिम बढ्दो

काठमाडौं । जल तथा मौसम विज्ञान विभागको बाढी पूर्वानुमान महाशाखाले आगामी तीन दिनसम्म देशका प्रमुख नदीहरूमा जलसतह उल्लेख्य रूपमा बढ्न सक्ने जनाउँदै बाढीको सम्भावनाबारे सतर्क रहन आग्रह गरेको छ ।

महाशाखाले मंगलबार बिहान ८ बजे सार्वजनिक गरेको बुलेटिनमा कोशी, नारायणी, कर्णाली र महाकाली नदीहरूको जलसतह हाल सतर्कता तहभन्दा तल भए पनि आगामी दिनहरूमा तीब्ररूपमा बढ्न सक्ने पूर्वानुमान गरिएको छ । कमला र बागमती नदीमा भने आज र भोलिमा सामान्य बढोत्तरी देखिने र पर्सि विशेषगरी बहाव उल्लेख्य हुने उल्लेख छ ।

महाशाखाका अनुसार साना नदीहरूमा आकस्मिक बाढीको जोखिम अझ बढी रहनेछ । विशेषगरी ताप्लेजुङ, सोलुखुम्बु, ओखलढुंगा, रामेछाप, काठमाडौं उपत्यका लगायत पूर्वी तथा मध्य पहाडी जिल्लाहरूमा आकस्मिक बाढीको मध्यम जोखिम रहेको छ ।

त्यस्तै, झापा, इलाम, चितवन, कास्की, दाङ, सुर्खेत, कैलाली, कञ्चनपुर, दार्चुला लगायतका जिल्लामा साना नदीहरूको बहाव उल्लेख्य रूपमा बढ्न सक्ने भएकाले पनि सतर्क रहन सुझाव दिइएको छ ।

तीन दिनको मौसमी पूर्वानुमान (२०८२ असार ३१ — साउन १)
असार ३१ गते (मंगलबार)
दिउँसोः अधिकांश प्रदेशमा आकाश सामान्यतया बदली रहनेछ । कोशी, बागमती, गण्डकी र लुम्बिनी प्रदेशका पहाडी भागहरूमा मेघगर्जन र चट्याङसहित हल्कादेखि मध्यम वर्षाको सम्भावना । एक–दुई स्थानमा भारी वर्षा पनि हुन सक्नेछ । उच्च पहाडी तथा हिमाली भेगमा हल्का हिमपात वा वर्षाको सम्भावना छ ।

रातिः समान रूपले बदली रहनेछ । कोशी, गण्डकी, लुम्बिनी, कर्णाली र सुदूरपश्चिम प्रदेशमा हल्कादेखि मध्यम वर्षा र एक–दुई स्थानमा भारी वर्षा हुन सक्छ । कोशी र मधेश प्रदेशका केही भागमा हावाहुरीको पनि सम्भावना छ ।

असार ३२ गते (बुधबार)
दिउँसोः देशभर आकाश सामान्य बदली रहनेछ । बागमती, गण्डकी र लुम्बिनी प्रदेशका धेरै स्थानमा वर्षा सम्भावित छ । कोशी, बागमती र गण्डकीका केही स्थानहरूमा भारी वर्षाको सम्भावना ।

रातिः आंशिकदेखि सामान्य बदली रहनेछ । कोशी, मधेश र बागमती प्रदेशका थोरै स्थानहरूमा भारी वर्षा हुने सम्भावना । हावाहुरी पनि मधेश र तराईका केही भागमा देखिन सक्छ ।

साउन १ गते (बिहीबार)
दिउँसोः बागमती, गण्डकी, लुम्बिनी, कर्णाली र सुदूरपश्चिम प्रदेशमा धेरै स्थानहरूमा हल्कादेखि मध्यम वर्षा सम्भावित । एक–दुई स्थानमा भारी वर्षा हुन सक्छ । मधेश प्रदेशमा पनि हावाहुरी देखिन सक्छ ।

रातिः कोशी र मधेश प्रदेशका साथै केही पहाडी भागहरूमा हल्कादेखि मध्यम वर्षाको सम्भावना । लुम्बिनी प्रदेशको तराईमा हावाहुरी चल्न सक्ने पूर्वानुमान गरिएको छ ।

विभागको आग्रह
बाढीको जोखिम रहेका क्षेत्रका स्थानीयवासी, यात्री, निर्माणकार्यमा संलग्न व्यक्ति र सम्बन्धित निकायहरूलाई आवश्यक सतर्कता अपनाउन विभागले पुनः आग्रह गरेको छ । विशेषगरी साना नदी किनारका बस्तीहरू, पहिरो सम्भावित भेग र डुबानमा पर्न सक्ने क्षेत्रहरूमा पूर्वतयारी आवश्यक भएको जनाइएको छ ।