काम नगर्ने ११ निर्माण कम्पनीलाई स्पष्टीकरणको अन्तिम मौका, कालोसूचीको तयारीमा खरिद कार्यालय

काठमाडौं । सम्झौता अनुसारको कार्य सम्पादन नगरेको भन्दै सार्वजनिक खरिद अनुगमन कार्यालयले ११ निर्माण तथा आपूर्ति कम्पनीविरुद्ध कालोसूचीमा राख्ने प्रक्रिया अघि बढाएको छ । ती कम्पनीलाई ७ दिनभित्र लिखित रूपमा स्पष्टीकरण बुझाउन कार्यालयले अन्तिम अवसर दिएको हो ।

विभिन्न सरकारी निकायबाट प्राप्त सिफारिसका आधारमा उनीहरूलाई कारबाही प्रक्रिया अघि बढाइएको जनाइएको छ । यसअघि ३० दिनको म्यादसहित कारण देखाउन पत्राचार गरिए पनि कम्पनीहरू कार्यालय सम्पर्कमा नआएपछि बुधबार सार्वजनिक सूचना प्रकाशित गरिएको हो ।

कार्यालयका अनुसार सार्वजनिक खरिद नियमावली, २०६४ को नियम १४१ (४क) अनुसार उक्त प्रक्रिया अगाडि बढाइएको हो ।

तोकेको समयसीमाभित्र सन्तोषजनक जवाफ नआएमा ती कम्पनीहरूलाई कालोसूचीमा राखिनेछ । कालोसूचीमा परेपछि तिनीहरू तोकिएको समयसम्म कुनै पनि सरकारी खरिदमा सहभागी हुन अयोग्य ठहरिनेछन् ।