नेताहरूको अभिव्यक्तिप्रति राजनीतिक प्रतिवाद गर्छुः रामकुमारी झाँक्री

काठमाडौं । नेकपा एकीकृत समाजवादीकी स्थायी कमिटी सदस्य रामकुमारी झाँक्रीले आफूविरुद्ध सार्वजनिक रूपमा व्यक्त गरिएका अभिव्यक्तिहरूप्रति राजनीतिक रूपमा प्रतिवाद गर्ने चेतावनी दिएकी छन् ।

पार्टीले आफूलाई स्पष्टीकरण सोधेको विषय निराधार भएको दाबी गर्दै बिहीबार झाँक्री पार्टी कार्यालय पुगिन् र सचिवालय बैठकमा आफ्नो भनाइ राख्न पाउनुपर्ने माग गर्दै औपचारिक निवेदन दर्ता गराइन् ।

‘म माथि उठाइएका प्रश्नबारे मैले बैठकमै स्पष्ट पार्ने इच्छा राखेकी छु,’ झाँक्रीले भनिन्, ‘तर सामाजिक सञ्जाल र मिडियामार्फत व्यक्त गरिएका नेताहरूका व्यक्तिगत टिप्पणीहरूलाई म चुप लागेर सहेर बस्न सक्दिन ।’

उनले पार्टीले जारी गरेको निर्देशनपछि आफूले कुनै सार्वजनिक टिप्पणी नगरेको स्मरण गराइन् । तर पार्टीका शीर्ष तहका नेताहरूले सार्वजनिक रूपमा लक्षित टिप्पणी गरेकोप्रति आपत्ति जनाउँदै अब चुप नबस्ने चेतावनी दिइन् ।

हाल स्थायी कमिटी बैठक बस्ने स्थिति नरहेकाले सचिवालय बैठकमै आफूलाई उपस्थित भई आफ्नो पक्ष राख्ने अवसर दिनुपर्ने माग गर्दै उनले पार्टी अध्यक्ष माधवकुमार नेपाललाई सम्बोधन गर्दै पत्र बुझाएकी हुन् ।

झाँक्रीले असार १४ गते लुम्बिनी प्रदेशस्तरीय युवा कार्यक्रमका क्रममा पार्टी नेतृत्वमा समयमै परिवर्तन गर्नुपर्ने धारणा राखेकी थिइन् । उक्त अभिव्यक्तिलाई लिएर पार्टीभित्र आन्तरिक असमझदारी चुलिएको हो ।

उनले स्पष्ट रूपमा भनेकी छन्, ‘पार्टीप्रति मेरो प्रतिबद्धता कायम छ, तर व्यक्तिविशेषले दिएको अनावश्यक टिप्पणीको राजनीतिक जवाफ म अवश्य दिन्छु।’

झाँक्रीको पछिल्लो कदमले पार्टीभित्रको आन्तरिक बहस अझ चर्किन सक्ने संकेत देखिएको छ ।