रौनकको शतकीय प्रदर्शनले नेपाललाई सेमिफाइनलमा पुर्‍यायो, भुटानविरुद्ध २९८ रनको धमाकेदार जित

काठमाडौं । रौनक श्रीवास्तवको विस्फोटक ब्याटिङ प्रदर्शनसँगै नेपालले भुटानलाई २९८ रनको फराकिलो अन्तरले पराजित गर्दै एसिसी यू–१६ इस्ट जोन कप क्रिकेट प्रतियोगिताको सेमिफाइनलमा स्थान सुरक्षित गरेको छ ।

मलेसियामा जारी प्रतियोगिताअन्तर्गत मंगलबार भएको खेलमा नेपालले पहिले ब्याटिङ गर्दै ५० ओभरमा ५ विकेट गुमाउँदै ३५८ रनको विशाल योगफल बनायो । जवाफी ब्याटिङमा उत्रिएको भुटान ३२.४ ओभरमै ६० रनमा समेटियो । उनका एक जना ब्याट्सम्यान क्रिजमा नआएपछि इनिङ्स सकिएको घोषणा गरिएको थियो ।

भुटानका लागि सुजन दावाले सबैभन्दा बढी १४ रन बनाए भने ओपनर उयोग छोफेलले १० रन जोडे । बाँकी खेलाडी दोहोरो अंकमा पुग्न असफल भए ।

नेपालको बलिङ आक्रमणमा कप्तान विपिनप्रसाद शर्माले उत्कृष्ट प्रदर्शन गर्दै १० ओभरमा ७ रन खर्चिएर ४ विकेट लिए । त्यस्तै सचिन भट्ट र सुयोग भट्टराईले समानरूपमा २÷२ विकेट झारे ।

त्यसअघि, टस जितेर ब्याटिङ रोजेको नेपालका लागि रौनक श्रीवास्तवले १३२ बलमा १६ चौका र ५ छक्का प्रहार गर्दै १६८ रनको शान्दार पारी खेले । सुरुवाती चरणमा १७ रनमै दुई विकेट गुमाएर दबाबमा परेको नेपाललाई रौनक र शिवान्श बजगाईंले तेस्रो विकेटका लागि ९१ रनको साझेदारी गर्दै सम्हाले । शिवान्शले ५४ रनको योगदान दिए ।

रौनकले चौथो विकेटका लागि सुगम बुढाथोकीसँग ७२ रन र पाँचौँ विकेटका लागि जोय थापासँग १७० रनको महत्वपूर्ण साझेदारी गरे । जोय ६७ बलमा ७ चौकासहित ६१ रनमा अविजित रहे ।

यसअघिको खेलमा शतक बनाएका प्रसिद्ध जैसी यसपटक ७ रनमै आउट भए भने परिमार्जन यादवले २ रन मात्र जोडे । भुटानका लागि सञ्जय दोर्जेले सबैभन्दा सफल बलरको रूपमा ३ विकेट लिए ।

यस जितसँगै नेपाल समूह ‘ए’बाट सबै चार खेल जित्दै शीर्ष स्थानमा रहँदै सेमिफाइनलमा प्रवेश गरेको हो । भुटानले भने समूह चरणका चारै खेल गुमाउँदै प्रतियोगिताबाट बाहिरिएको छ ।

प्रतियोगिता एसीसी (एसियाली क्रिकेट परिषद्) द्वारा आयोजना गरिएको हो । समूह ‘ए’ मा नेपाल, सिंगापुर, इन्डोनेसिया, भुटान र जापान छन्, भने समूह ‘बी’ मा मलेसिया, हङकङ, माल्दिभ्स, थाइल्याण्ड र म्यानमार प्रतिस्पर्धामा छन् ।