देशभर ७५३ स्थानीय तहको बजेट सार्वजनिक हुँदै

काठमाडौं । देशभरिका सबै ७५३ स्थानीय तहहरूले आगामी आर्थिक वर्ष २०८२/८३ का लागि आफ्नो बजेट मंगलबार सार्वजनिक गर्ने तयारी गरेका छन् ।

संविधानले स्थानीय तहहरूलाई असार १० गतेभित्र बजेट सार्वजनिक गर्नुपर्ने व्यवस्था गरेको छ । सोहीअनुसार अधिकांश गाउँपालिका, नगरपालिका र महानगरहरूले आ-आफ्नो गाउँ वा नगरसभामा राजस्व र खर्चको अनुमान पेस गर्दैछन् ।

केही स्थानीय तह, जस्तै भरतपुर महानगरपालिकाले भने निर्धारित मितिभन्दा अगावै बजेट सार्वजनिक गरिसकेका छन् ।

संविधानको व्यवस्था अनुसार, बजेट असार १० भित्र पेस गरिसक्नुपर्ने र असार मसान्तभित्र पारित हुनुपर्ने प्रावधान छ । यसले वित्तीय पारदर्शिता र योजना कार्यान्वयनलाई समयमै अघि बढाउने लक्ष्य लिएको छ ।

यसअघि संघीय सरकारले जेठ १५ मा र प्रदेश सरकारले असार १ गते आ-आफ्नो बजेट प्रस्तुत गरिसकेका छन् । मंगलबार नै संघीय सरकारले प्रतिनिधिसभाबाट आफ्नो बजेट पारित गर्ने तयारीसमेत गरेको छ ।