डाइभर्सन निर्माणपछि बीपी राजमार्गमा साना सवारी सञ्चालन

काठमाडौं । लगातारको वर्षाका कारण असोज ९ गतेदेखि अवरुद्ध बनेको बीपी राजमार्गमा सवारीसाधन सञ्चालनमा आएको छ । बाढी र पहिरोका कारण क्षतिग्रस्त सडकखण्डमा अस्थायी डाइभर्सन निर्माण गरिएपछि राजमार्गमा आवागमन सुरु भएको हो ।

सडक डिभिजन कार्यालय भक्तपुरका अनुसार तत्कालका लागि साना सवारीसाधनलाई मात्र राजमार्गमा सञ्चालन गर्न अनुमति दिइएको छ । सडकको अवस्था हेरेर दिउँसोदेखि सबै प्रकारका सवारीसाधन सञ्चालनमा ल्याउने तयारी भइरहेको कार्यालयले जनाएको छ ।

रोशी खोलामा आएको बाढीका कारण बीपी राजमार्गका विभिन्न स्थानमा बनाइएका अस्थायी डाइभर्सन बगाएपछि सडक अवरुद्ध भएको थियो । नमोबुद्ध नगरपालिका–६ को चौकीडाँडा, रोशी गाउँपालिका–७ को घुमाउने तथा रोशी गाउँपालिका–११ र १२ को माम्ती क्षेत्रमा बाढीले डाइभर्सनमा क्षति पुर्‍याएको थियो ।

त्यस्तै, नमोबुद्ध–६ को चौकीडाँडा, रोशी–७ को चारसयवेशी, रोशी–८ को गिम्दीवेशी र रोशी–११ को माम्ती क्षेत्रमा पहिरो खसेपछि सडक आवागमन प्रभावित बनेको थियो ।

सडक डिभिजन कार्यालयले चौकीडाँडामा खोलाको सतहबाट र खोलाभन्दा माथिल्लो भागबाट गरी दुई स्थानमा डाइभर्सन निर्माण गरेको जनाएको छ । अन्य क्षतिग्रस्त स्थानमा पनि आवश्यक मर्मत तथा व्यवस्थापन गरेपछि सवारी सञ्चालन सहज बनाइएको हो ।

कार्यालयका अनुसार अहिले साना सवारीसाधन सञ्चालन भइरहेका छन् । ६ चक्के मालवाहक ट्रक, बस तथा मिनीबसजस्ता ठूला सवारीसाधनलाई भने सडकको अवस्था थप परीक्षण गरेपछि केही घण्टापछि मात्रै सञ्चालनमा ल्याइनेछ ।