पहिरोले खिजीदेम्बाको फुलमती माविमा क्षति, प्रहरी कार्यालयसमेत जोखिममा

खिजीफलाटे (ओखलढुंगा) । लगातार भइरहेको वर्षाका कारण ओखलढुंगाको खिजीदेम्बा गाउँपालिकास्थित फुलमती माध्यमिक विद्यालयमा पहिरोले क्षति पुर्‍याएको छ । शुक्रबार गएको पहिरोले विद्यालयको कक्षाकोठासहित डेस्क–बेन्च तथा अन्य भौतिक संरचनामा क्षति पुगेको हो ।

पहिरोका कारण विद्यालयको कक्षा २ कोठामा ठूलो क्षति पुगेको छ । पहिरोसँगै आएको लेदो कक्षाकोठाभित्र पसेपछि पठनपाठनका लागि प्रयोग हुने सामग्री तथा डेस्क–बेन्चमा क्षति पुगेको विद्यालयले जनाएको छ ।

पहिरोले विद्यालय परिसरमा रहेका ढल तथा पानी निकासका संरचनासमेत पुरिएका छन् । लेदो र माटो थुप्रिएपछि पानी निकासमा समस्या भएको छ ।

स्थानीय सरकारले वर्षाका कारण विद्यालयमा बिदा घोषणा गरेका कारण पहिरो जाँदा विद्यार्थी तथा शिक्षक विद्यालयमा उपस्थित थिएनन् । बिदा नभएको अवस्थामा ठूलो मानवीय क्षति हुन सक्ने जोखिम रहेको स्थानीयको भनाइ छ ।

विद्यालय नजिकैबाट गएको पहिरो इलाका प्रहरी कार्यालय खिजीफलाटेको कार्यालय रहेको भवन आसपाससम्म पुगेको छ । पहिरोका कारण प्रहरी कार्यालयको भवनसमेत जोखिममा परेको छ ।

विद्यालय र प्रहरी कार्यालय दुवै जोखिममा परेपछि थप पहिरोको सम्भावनालाई ध्यानमा राख्दै स्थानीय तह तथा सम्बन्धित निकायले आवश्यक सावधानी अपनाउनुपर्ने अवस्था देखिएको छ । क्षतिको थप विवरण संकलन तथा जोखिम न्यूनीकरणका लागि आवश्यक पहल भइरहेको जनाइएको छ ।