प्रतिनिधि सभाबाट तीन विधेयक अघि बढाउने प्रस्ताव स्वीकृत

काठमाडौं । प्रतिनिधि सभाको बुधबार बसेको बैठकले विभिन्न मन्त्रालयसँग सम्बन्धित तीन विधेयकमाथि विचार गरियोस् भन्ने प्रस्ताव स्वीकृत गरेको छ ।

बैठकले अर्थमन्त्री डा. स्वर्णिम वाग्लेले प्रस्तुत गरेका ‘नागरिक लगानी कोष (तेस्रो संशोधन) विधेयक, २०८३’ र ‘भुक्तानी तथा फस्र्यौट (पहिलो संशोधन) विधेयक, २०८३’ माथि विचार गरियोस् भन्ने प्रस्ताव पारित गरेको हो ।

त्यस्तै, कृषि, वन तथा वातावरण मन्त्री गीता चौधरीले राष्ट्रिय सभाबाट उत्पत्ति भएको ‘सङ्क्रामक पशु रोग (नियन्त्रण) विधेयक, २०८३’ माथि विचार गरियोस् भन्ने प्रस्ताव प्रस्तुत गरेकी थिइन् । उक्त प्रस्ताव पनि प्रतिनिधि सभाले सर्वसम्मत रूपमा स्वीकृत गरेको छ ।

तीनवटै विधेयकमाथि विचार गरियोस् भन्ने प्रस्तावमाथिको छलफलका क्रममा सांसदहरूले विधेयकका विभिन्न प्रावधानबारे पक्ष तथा विपक्षमा धारणा राख्दै प्रश्न गरेका थिए । सांसदहरूले उठाएका प्रश्नको सम्बन्धित मन्त्रीहरूले बैठकमै जवाफ दिएका थिए ।

यसैबीच, बैठकमा पूर्वाधार विकास मन्त्री सुनिल लम्सालले ‘फोहोरमैला व्यवस्थापन विधेयक, २०८३’ प्रस्तुत गरेका छन् । उनले उक्त विधेयक संसद्मा प्रस्तुत गर्न अनुमति मागेपछि विधेयक प्रतिनिधि सभामा पेस गरिएको हो ।