ग्यास अभावबीच उद्योगमन्त्री गौरीकुमारी यादवले बुझाइन् राजीनामा

काठमाडौं । उद्योग, वाणिज्य तथा आपूर्तिमन्त्री गौरीकुमारी यादवले पदबाट राजीनामा दिएकी छन् । उनले बिहीबार प्रधानमन्त्री बालेन शाहसमक्ष आफ्नो राजीनामा बुझाएकी हुन् ।

देशभर करिब एक महिनादेखि खाना पकाउने एलपी ग्यासको अभाव चुलिँदै गएपछि मन्त्री यादवमाथि आपूर्ति व्यवस्थापन गर्न नसकेको भन्दै दबाब बढ्दै आएको थियो । ग्यासका लागि उपभोक्ताहरू घाम–पानी नभनी घण्टौँ तथा कयौँ दिनसम्म लाइन बस्नुपर्ने अवस्था बनेको छ ।

यसैबीच, बुधबार सिंहदरबारमा बसेको उद्योग तथा वाणिज्य र श्रम तथा उपभोक्ता हित समितिको बैठकमा मन्त्री यादवले ग्यास आपूर्ति सहज बनाउन नसकेको अवस्थाप्रति असन्तुष्टि व्यक्त गरेकी थिइन् । उनले उद्योगीका कारण आफू निरीह भएर बस्नुपरेको गुनासो गरेकी थिइन् ।

बैठकमा उनले उपभोक्तालाई ग्यास उपलब्ध नगराउने उद्योगीमाथि कडा कारबाही गर्नुपर्ने धारणा राखेकी थिइन् । हाल देशभर ग्यास आपूर्ति गर्ने ५८ वटा उद्योग रहेको उल्लेख गर्दै उनले ती उद्योग खारेज गरेर नेपाल आयल निगमले नै ग्यास उद्योग सञ्चालन गर्नुपर्ने प्रस्तावसमेत अघि सारेकी थिइन् ।

मन्त्री यादवले उद्योगीहरूलाई लक्षित गर्दै ‘पाता कस्नुपर्ने’ अभिव्यक्ति दिएपछि उद्योगीहरूले बुधबार नै प्रधानमन्त्री बालेन शाहको सचिवालयमा गुनासो गरेका थिए । त्यसपछि प्रधानमन्त्रीको सचिवालयले उद्योगीहरूलाई बोलाएर विवाद साम्य पार्ने प्रयास गरेको थियो ।

तर, उद्योगीहरूले मन्त्रीले आफ्नो अभिव्यक्ति नसच्याए ग्यास आपूर्ति नै रोक्ने चेतावनी दिएका थिए । यहीबीच मन्त्री यादवले राजीनामा बुझाएकी हुन् ।

ग्यासको नियमित आपूर्ति हुन नसक्दा अहिले देशभरका उपभोक्ता चरम समस्यामा परेका छन् । सरकार र व्यवसायीबीचको विवादका कारण सर्वसाधारणले खाना पकाउने ग्यासका लागि लामो समय लाइन बस्नुपर्ने बाध्यता झेलिरहेका छन् ।