प्रतिनिधिसभा बैठक बस्दै, चार विधेयक पेस हुँदै

काठमाडौं । सङ्घीय संसद्अन्तर्गत प्रतिनिधिसभाको बैठक आज दिउँसो १ः०० बजे सिंहदरबारमा बस्दैछ । बैठकमा विभिन्न विधेयक पेस तथा छलफल गर्ने कार्यसूची तय गरिएको छ ।

सङ्घीय संसद् सचिवालयका अनुसार अर्थमन्त्री डा. स्वर्णिम वाग्लेले ‘कर्मचारी सञ्चय कोष (१०औँ संशोधन) विधेयक, २०८३’ प्रस्तुत गर्नेछन् । कानुन, न्याय तथा संसदीय मामिलामन्त्री सोविता गौतमले ‘मेलमिलापसम्बन्धी (दोस्रो संशोधन) विधेयक, २०८३’ पेस गर्ने कार्यसूची छ ।

त्यस्तै, युवा, श्रम तथा रोजगारमन्त्री रामजी यादवले ‘बालश्रम (निषेध तथा नियमित गर्ने) विधेयक, २०८३’ प्रस्तुत गर्ने कार्यक्रम रहेको छ ।

प्रधानमन्त्री वालेन्द्र शाह ‘बालेन’ को तर्फबाट कानुनमन्त्री गौतमले ‘संवैधानिक निकायका पदाधिकारीहरूको पारिश्रमिक, सेवाको शर्त र सुविधासम्बन्धी (पहिलो संशोधन) विधेयक, २०८३’ माथि विचार गरियोस् भन्ने प्रस्तावसमेत पेस गर्नेछिन् ।

यसैगरी, राज्य व्यवस्था तथा सुशासन समितिको प्रतिवेदनसहित ‘नेपाल विशेष सेवा ऐन, २०४२ को साविकको व्यवस्था जगाउनेसम्बन्धी विधेयक, २०८३’ पारित गरियोस् भन्ने प्रस्ताव पनि मन्त्री गौतमले नै प्रस्तुत गर्ने कार्यसूची छ ।

विधेयकमाथिको कार्य अघि बढाउनुअघि परराष्ट्र मन्त्रालय तथा युवा, श्रम तथा रोजगार मन्त्रालयसँग सम्बन्धित मौखिक प्रश्नको जवाफ सम्बन्धित मन्त्रीहरूले दिने कार्यक्रमसमेत रहेको छ ।

चार संसदीय समितिको बैठक पनि
प्रतिनिधिसभाको बैठकसँगै आज चारवटा संसदीय समितिका बैठक पनि बस्ने भएका छन् ।

बिहान ९ः०० बजे शिक्षा, स्वास्थ्य तथा सूचना प्रविधि समितिको बैठकमा ‘राष्ट्रिय विधि विज्ञान प्रयोगशाला (स्थापना र सञ्चालन) विधेयक, २०८१’ माथि छलफल हुनेछ ।

त्यस्तै, बिहान १०ः०० बजे बस्ने पूर्वाधार विकास समितिको बैठकमा राष्ट्रिय गौरवका आयोजना अध्ययन उपसमितिको प्रतिवेदनमाथि छलफल गर्ने कार्यसूची छ ।

विकास, आर्थिक मामिला तथा सुशासन समितिको बैठक बिहान ११ः३० बजे बस्नेछ । उक्त बैठकमा ‘राष्ट्रिय सदाचार नीति, २०८३’ कार्यान्वयनका विषयमा छलफल गरिनेछ ।

सङ्घीयता सबलीकरण तथा राष्ट्रिय सरोकार समितिको बैठकमा भने समितिको बैठक सञ्चालन कार्यविधिसम्बन्धी विषयमा छलफल हुने सङ्घीय संसद् सचिवालयले जनाएको छ ।