कप्तानगन्ज घटनामा थप एक घाइतेको मृत्यु, मृतक संख्या तीन पुग्यो

काठमाडौं । सुनसरीको देवानगन्ज गाउँपालिका–३, कप्तानगन्जमा भएको हिंसात्मक घटनामा गोली लागेर घाइते भएका अर्का एक युवकको उपचारका क्रममा काठमाडौँमा मृत्यु भएको छ । यससँगै उक्त घटनामा ज्यान गुमाउनेको संख्या तीन पुगेको छ ।

जिल्ला प्रहरी परिसर काठमाडौंका प्रमुख एसएसपी दिलिप ढुंगानाका अनुसार २१ वर्षीय रवीन्द्रकुमार मेहताको त्रिभुवन विश्वविद्यालय शिक्षण अस्पतालमा उपचारका क्रममा मंगलबार निधन भएको हो । गोली लागेपछि उनलाई थप उपचारका लागि काठमाडौं ल्याइएको थियो ।

कप्तानगन्जमा साउन ९ गते दुई समूहबीच सुरु भएको विवादले उग्र रूप लिएपछि अवस्था नियन्त्रणमा लिन साउन १० गते सुरक्षाकर्मीले गोली चलाएका थिए । उक्त क्रममा स्थानीय २१ वर्षीय ओमप्रकाश मेहताको घटनास्थलमै मृत्यु भएको थियो भने अन्य केही व्यक्ति घाइते भएका थिए ।

घटनापछि उपचाररत रहेका अर्का घाइते २२ वर्षीय जयप्रकाश मेहताको पनि गत बिहीबार विराटनगरमा उपचारकै क्रममा मृत्यु भएको थियो । मंगलबार रवीन्द्रकुमार मेहताको पनि निधन भएसँगै घटनामा मृत्यु हुनेको संख्या तीन पुगेको हो ।

प्रहरीका अनुसार घटनामा घाइते भएका केही व्यक्तिको अवस्था अझै गम्भीर रहेकाले उनीहरूको विभिन्न अस्पतालमा उपचार भइरहेको छ । प्रहरीले घटनाको अनुसन्धान जारी रहेको जनाएको छ ।