बैंककको बारमा भीषण आगलागी, २७ जनाको मृत्यु, ६० भन्दा बढी घाइते

काठमाडौं । थाइल्यान्डको राजधानी बैंककस्थित एक लोकप्रिय बारमा सोमबार मध्यरातपछि भएको भीषण आगलागीमा कम्तीमा २७ जनाको मृत्यु भएको छ भने ६० भन्दा बढी घाइतेको विभिन्न अस्पतालमा उपचार भइरहेको छ । केही व्यक्ति अझै सम्पर्कविहीन रहेको स्थानीय सञ्चारमाध्यमहरूले जनाएका छन् ।

आगलागीपछि घटनास्थल पुगेका उद्धारकर्मीले अधिकांश मृतकको शव भवनको पछाडिपट्टि रहेको शौचालय क्षेत्रमा फेला पारेका थिए । प्रारम्भिक जानकारीअनुसार आगो र बाक्लो धुवाँबाट बच्न त्यहाँ लुकेका उनीहरू बाहिर निस्कन नसक्दा ज्यान गएको हो ।

थाइल्यान्डका प्रधानमन्त्री अनुटिन चार्नभिराकुलले घटनास्थलको निरीक्षणपछि आगलागीको कारणबारे अनुसन्धान भइरहेको जानकारी दिएका छन् । उनका अनुसार घटनाको समयमा सांगीतिक प्रस्तुति दिइरहेका एक कलाकारले विद्युत् स्विचमा आगो लागेपछि विस्फोट भएको र त्यसपछि केही क्षणमै आगो तीव्र रूपमा फैलिएको बताएका छन् ।

स्थानीय सञ्चारमाध्यमका अनुसार बैंककको चातुचक जिल्लामा रहेको ‘रोङ बियर ना लाट फ्राओ’ बार तथा मनोरञ्जनस्थलमा भएको आगलागीमा ९ पुरुष र १८ महिलाको मृत्यु भएको पुष्टि भएको छ । आगो करिब आधा घण्टापछि नियन्त्रणमा आए पनि त्यसअघि नै ठूलो मानवीय क्षति भइसकेको थियो ।

घटनापछि सार्वजनिक भएका तस्बिरहरूमा बारभित्रका फर्निचर, भित्ताहरू र छत पूर्ण रूपमा जलेर कालो भएको देखिएको छ भने भवनबाहिर शव राखिएका झोलाहरूको लाम देख्न सकिन्छ ।

बैंककका गभर्नर चाचार्ट सित्तिपुन्टले बारभित्र प्रयोग गरिएका ज्वलनशील सजावटी सामग्रीका कारण आगो तीव्र गतिमा फैलिएको प्रारम्भिक निष्कर्ष रहेको बताएका छन् । साथै, आपत्कालीन निकास मार्गमा सामान बिक्रीका टेबुल राखिएकाले मानिसहरू बाहिर निस्कन कठिन भएको हुन सक्ने आशंका व्यक्त गर्दै उनले यसबारे फरेन्सिक टोलीबाट विस्तृत अनुसन्धान भइरहेको जानकारी दिएका छन् ।

स्थानीय समयअनुसार राति करिब ११ः३० बजे एक यात्रुले बारमा आगो लागेको देखेपछि दमकललाई खबर गरेका थिए । ती यात्रुले आफ्नै प्रयासमा सवारीबाट ओर्लिएर सिसा फुटाई दुई जनाको उद्धार गर्न सफल भएको पनि स्थानीय सञ्चारमाध्यमहरूले उल्लेख गरेका छन् ।