इंग्ल्यान्डको दमदार सुरुआत, क्रोएसियामाथि ४–२ को जित

काठमाडौं । फिफा विश्वकप २०२६ मा इंग्ल्यान्डले विजयी सुरुआत गरेको छ । समूह ‘एल’ अन्तर्गत अमेरिकाको डालासमा गएराति भएको खेलमा इंग्ल्यान्डले क्रोएसियालाई ४–२ गोलअन्तरले पराजित गरेको हो ।

इंग्ल्यान्डको जितमा कप्तान ह्यारी केन नायक बने । उनले दुई गोल गरे भने जुड बेलिङघम र मार्कुस र्‍यासफोर्डले एक–एक गोल थपे ।

खेलको १२औँ मिनेटमा पेनाल्टीमार्फत केनले गोल गर्दै इंग्ल्यान्डलाई सुरुआती अग्रता दिलाएका थिए । तर ३६औँ मिनेटमा मार्टिन बिउटुरिनाले गोल गर्दै क्रोएसियालाई १–१ को बराबरीमा फर्काए ।

पहिलो हाफको अन्त्यअघि ४२औँ मिनेटमा केनले व्यक्तिगत दोस्रो गोल गर्दै इंग्ल्यान्डलाई पुनः अग्रता दिलाए । यद्यपि इन्जुरी समयमा पिटर मुसाले गोल गरेपछि पहिलो हाफ २–२ को बराबरीमा सकियो ।

दोस्रो हाफ सुरु भएको केहीबेरमै जुड बेलिङघमले गोल गर्दै इंग्ल्यान्डलाई ३–२ को अवस्थामा पुर्‍याए । त्यसपछि खेलको ८५औँ मिनेटमा मार्कुस र्‍यासफोर्डले गोल थप्दै इंग्ल्यान्डको जित सुनिश्चित गरे ।

पहिलो हाफमा आक्रामक देखिएको क्रोएसिया दोस्रो हाफमा भने इंग्ल्यान्डको दबाब झेल्न बाध्य भयो । यो जितसँगै इंग्ल्यान्डले विश्वकप अभियान सुखद् ढंगले सुरु गरेको छ ।