गैरहाजिर २७ प्रहरीलाई सात दिनभित्र हाजिर हुन निर्देशन

काठमान्डु । कार्यालयमा बिनाकारण अनुपस्थित रहेका २७ प्रहरी कर्मचारीलाई सात दिनभित्र अनिवार्य हाजिर हुन प्रहरी प्रधान कार्यालयले सार्वजनिक सूचना जारी गरेको छ । कार्यालयले नाम, ठेगाना र गैरहाजिर भएको मिति उल्लेख गर्दै प्रहरीले सार्वजनिक सूचना जारी गरेको हो ।

गैरहाजिर हुनेमा प्रहरी सहायक निरीक्षक १ जना, प्रहरी हवल्दार २ जना, सहायक हवल्दार ३ जना, प्रहरी जवान २० जना, कार्यालय सहयोगी १ जना रहेका छन् ।

सूचनाअनुसार दुई जनाबाहेक सबैजना जेनजी आन्दोलनपछि सम्पर्कविहीन भएको उल्लेख गरिएको छ ।

सूचना जारी भएको बाटोको म्यादबाहेक थप सात दिनभित्र सम्बन्धित कर्मचारीले हाजिर हुनुपर्नेछ । हाजिर हुँदा उनीहरूले गैरहाजिर भएको कारणसहित स्पष्टीकरण दिनुपर्नेछ ।

निर्देशन नमान्नेलाई कानुनअनुसार कारबाही गरिने चेतावनी पनि प्रहरी प्रधान कार्यालयले दिएको छ ।