सभामुखमा अर्यालको औपचारिक प्रवेश, राष्ट्रपतिले गराए शपथ

काठमाडौं । नवनिर्वाचित सभामुख डोलप्रसाद अर्यालले आइतबार पद तथा गोपनीयताको शपथ लिएका छन् । राष्ट्रपति भवन शीतल निवासमा आयोजित विशेष समारोहमा राष्ट्रपति रामचन्द्र पौडेलले उनलाई प्रतिनिधिसभाको १०औँ सभामुखका रूपमा शपथ गराएका हुन् ।

यसअघि बसेको प्रतिनिधिसभा बैठकमा ज्येष्ठ सदस्य अर्जुननरसिंह केसीले अर्याल निर्विरोध रूपमा सभामुख चयन भएको घोषणा गरेका थिए । २७५ सदस्यीय प्रतिनिधिसभामा राष्ट्रिय स्वतन्त्र पार्टी (रास्वपा) का १८२ सांसदको समर्थन प्राप्त भएपछि अन्य कुनै दलबाट उम्मेदवारी नपरेको र उनी सर्वसम्मत रूपमा सभामुख बनेका हुन् ।

धादिङको ज्वालामुखी गाउँपालिकामा २०३१ साल भदौ ६ गते जन्मिएका अर्याल रास्वपाका संस्थापक उपाध्यक्षसमेत हुन् । २०७९ सालमा पार्टी गठनका क्रममा उनले महत्त्वपूर्ण भूमिका निर्वाह गरेका थिए । काठमाडौं क्षेत्र नम्बर ९ बाट निर्वाचित सांसद अर्याल अघिल्लो संसदीय कार्यकालमा श्रम, रोजगार तथा सामाजिक सुरक्षा मन्त्रीको जिम्मेवारीमा समेत रहेका थिए ।

नयाँ सभामुखका रूपमा अर्यालसामु संसद्मा बढ्दो राजनीतिक ध्रुवीकरण कम गर्दै दलहरूबीचको मतभेदलाई संवादमार्फत व्यवस्थापन गर्ने चुनौती रहेको छ । सदनलाई सन्तुलित, मर्यादित र प्रभावकारी ढङ्गले सञ्चालन गर्नु अब उनको नेतृत्वको मुख्य परीक्षा हुनेछ ।