पूर्वप्रधानमन्त्री केपी शर्मा ओली पक्राउ, गुण्डु निवासबाट नियन्त्रणमा

काठमाडौं । पूर्वप्रधानमन्त्री तथा नेकपा एमालेका अध्यक्ष केपी शर्मा ओलीलाई प्रहरीले भक्तपुरस्थित उनको गुण्डु निवासबाट पक्राउ गरेको छ ।

प्रहरीले उनलाई नियन्त्रणमा लिन काठमाडौं उपत्यका अपराध अनुसन्धान कार्यालयका एसएसपी सन्तोष खड्काको नेतृत्वमा मध्यरातिदेखि नै टोली परिचालन गरेको थियो । उक्त टोलीमा भक्तपुर प्रहरीका विभिन्न युनिट पनि संलग्न रहेका थिए ।

प्रहरी टोली पुग्दा ओली सुतिसकेका कारण तत्काल पक्राउ नगरी निवास वरपर सुरक्षा घेरा कायम गरिएको थियो । बिहान उठेपछि उनलाई नियन्त्रणमा लिइएको प्रहरीले जनाएको छ ।

पक्राउपछि ओली आफ्नै सवारी साधनमार्फत प्रहरीको साथमा महाराजगन्जस्थित प्रहरी प्रतिष्ठानतर्फ लगिएका छन् । उनीमाथि आवश्यक कानुनी प्रक्रिया आइतबार पूरा गरिने बताइएको छ ।

यसअघि प्रहरी महानिरीक्षक (आईजीपी) को नक्सालस्थित निवासमा गृहमन्त्री सुधन गुरुङसहित मध्यरातसम्म भएको छलफलपछि गृह मन्त्रालयले ओलीलाई पक्राउ गर्न लिखित आदेश जारी गरेको थियो । सोही आदेशअनुसार प्रहरी परिचालन गरिएको हो ।