देशभर मतदाता शिक्षा कार्यक्रम सुरु, बदर मत घटाउने आयोगको लक्ष्य

काठमाडौं । आसन्न निर्वाचनलाई लक्षित गर्दै देशभर मतदाता शिक्षा कार्यक्रम सुरु गरिएको छ । निर्वाचन आयोग नेपालका कार्यवाहक प्रमुख निर्वाचन आयुक्त रामप्रसाद भण्डारी का अनुसार ७५३ वटै स्थानीय तहमा मतदाता शिक्षा अभियान सञ्चालनमा आएको हो ।

उनका अनुसार प्रत्येक वडामा एक–एक जनाको दरले मतदाता शिक्षा स्वयंसेवक परिचालन गरिएको छ । स्वयंसेवकहरूले मतदान प्रक्रिया सम्बन्धी अन्योल हटाउने, मतदातालाई सही तरिकाले मतदान गर्न अभिमुखीकरण गर्ने तथा बदर मत घटाउन सहयोग गर्नेछन् । कार्यक्रम स्वयंसेवकमार्फत प्रत्यक्ष रूपमा सञ्चालन भइरहेको आयोगले जनाएको छ ।

मतदाता शिक्षा अभियानलाई प्रभावकारी बनाउन सामाजिक सञ्जालमार्फत पनि जनचेतनामूलक सामग्री प्रचारप्रसार भइरहेको छ । आयोगले यस अभियानमार्फत मतदान प्रतिशत बढाउने र बदर मतको दर घटाउने लक्ष्य लिएको जनाएको छ ।

भण्डारीका अनुसार यसपटक ठूलो संख्यामा नयाँ मतदाता नामावलीमा समावेश भएका छन्, जसमा युवाको संख्या उल्लेख्य छ । युवा मतदाता सचेत भएकाले मतदान सहभागिता बढ्ने र बदर मत घट्ने आयोगको अनुमान रहेको उनले बताए । साथै, कार्यक्रमको प्रभावकारिताको अनुगमन पनि गरिने जानकारी दिइएको छ ।

मतदाता शिक्षा कार्यक्रमअन्तर्गत देशभरका नगरपालिका तथा गाउँपालिकाका ६ हजार ७४३ वडामा सोमबारदेखि स्वयंसेवक परिचालन गरिएको हो । उनीहरूले फागुन १७ गतेसम्म अभियान सञ्चालन गर्नेछन् ।

पछिल्ला तीन निर्वाचनका तथ्यांकले बदर मतको प्रतिशत क्रमशः बढ्दै गएको देखाएको छ । २०७० सालको संविधानसभा निर्वाचनमा ७८.३४ प्रतिशत मतदान हुँदा ४.९६ प्रतिशत मत बदर भएको थियो । २०७४ सालको प्रतिनिधिसभा निर्वाचनमा ६८.६७ प्रतिशत मतदान भई ५.१६ प्रतिशत मत बदर भएको थियो भने २०७९ सालमा ६१.६३ प्रतिशत मतदान हुँदा ५.१९ प्रतिशत मत बदर भएको तथ्यांक छ ।

यसपटक डिजिटल माध्यमबाट समेत मतदाता शिक्षा विस्तार गरिएकाले बदर मत घट्ने विश्वास आयोगले व्यक्त गरेको छ ।