बक्यौता असुलीमा प्रगति, ऊर्जामन्त्री घिसिङको धन्यवाद ज्ञापन

काठमाडौं । ऊर्जामन्त्री कुलमान घिसिङले लामो समयदेखि रोकिएको विद्युत् बक्यौता असुली अब ठोस नतिजातर्फ अघि बढेको भन्दै सबै पक्षप्रति आभार व्यक्त गरेका छन् ।

नेपाल विद्युत प्राधिकरणले लोडसेडिङको समयमा डेडिकेटेड र ट्रङ्क लाइनमार्फत विद्युत् उपभोग गर्ने उद्योगहरूबाट किस्तामा महसुल असुलीको प्रक्रिया अघि बढाएको छ । प्राधिकरणका अनुसार अधिकांश उद्योगले पहिलो किस्ता भुक्तानी गरिसकेका छन् ।

राजनीतिक दबाबका कारण अवरुद्ध रहेको बक्यौता असुली प्रक्रिया पुनः गति लिन थालेको भन्दै मन्त्री घिसिङले यसलाई ‘साझा जिम्मेवारी र सहकार्यको नतिजा’ बताएका छन् ।

उद्योगीहरूले किस्ता तिर्न थालेपछि उनले बक्यौता असुलीमा सहयोग पुर्‍याउने प्रधानमन्त्री, अर्थमन्त्री, उद्योग वाणिज्य तथा आपूर्तिमन्त्री, नेपाल उद्योग वाणिज्य महासंघका पदाधिकारी तथा सरोकारवालालाई धन्यवाद दिएका छन् ।

“सबैको निरन्तर चासो, निगरानी र खबरदारीका कारण बक्यौता असुली अब ठोस परिणामतर्फ अग्रसर भएको छ । हालको चुनौतीपूर्ण परिस्थितिमा देशप्रतिको दायित्वबोधका साथ किस्ता तिर्न सुरु गर्नुभएका सम्पूर्ण उद्योगी साथीहरूलाई हार्दिक धन्यवाद,” सामाजिक सञ्जालमा घिसिङले लेखेका छन् ।