किरातीको पाँच प्रस्तावः लिखित प्रतिबद्धता भए मात्र सहयात्रा सम्भव

काठमाडौं । नेकपा (माओवादी केन्द्र) का नेता सुदन किरातीले पार्टीभित्र रूपान्तरणको दिशामा पाँच बुँदे प्रस्ताव सार्वजनिक गरेका छन् । उनले नेताहरूले पार्टी रूपान्तरणका विषयमा स्पष्ट लिखित प्रतिबद्धता बिना कुनै पनि सहयात्रा सम्भव नहुने बताएका छन् ।

उनले हालको पार्टी संरचना, नेतृत्व शैली र विचारगत दिशाबारे असन्तुष्टि जनाउँदै नयाँ संरचना निर्माण, तेस्रो पुस्तालाई जिम्मेवारी हस्तान्तरण र आन्तरिक एकतालाई पुनर्संरचना गर्ने प्रस्ताव अघि सारेका छन् ।

पहिलो प्रस्तावमा विधान संशोधनमार्फत नयाँ संरचना निर्माण गरी अधिकार बाँडफाँड गर्ने भनिएको छ । आवश्यक परे संरक्षकले पार्टी विघटन गरी अधिवेशनको घोषणा गर्न पाउने व्यवस्था पनि उल्लेख गरिएको छ ।

दोस्रो प्रस्तावमा हाल चलिरहेको भ्रष्टाचारसम्बन्धी मुद्दा टुंगोमा पुग्ने अघि हुने कुनै पनि अपूर्ण वा अपवित्र एकता प्रक्रिया तत्काल रोक्न माग गरिएको छ । उनलले पार्टी, आन्दोलन र जेन–जी विद्रोहको भावनाविपरीत व्यक्तिहरूसँगको एकता ‘अनैतिक र अस्वीकार्य’ भएको बताएका छन् ।

तेस्रो बुँदामा अध्यक्ष पुष्पकमल दाहाल ‘प्रचण्ड’लाई संरक्षक वा सर्वमान्य नेता बनाई पदाधिकारी संरचनालाई निर्देशक कमिटीमा रूपान्तरण गर्ने सुझाव दिइएको छ ।

चौथो बुँदामा स्थायी समितिदेखि अग्रज नेताहरूसम्मको सहभागिता रहने एक केन्द्रीय राजनीतिक समिति गठन गर्ने प्रस्ताव गरिएको छ, जसले राष्ट्रिय महत्त्वका निर्णय र सांसद चयन अधिकार पनि प्रयोग गर्ने व्यवस्था विधानमै गर्नुपर्ने भनिएको छ ।

पाँचौं बुँदामा तेस्रो पुस्तालाई कार्यकारी जिम्मेवारी दिने, र सो पुस्ताले पुराना नेताहरूको अनुभव र नयाँ पुस्ताको ऊर्जा जोडेर पार्टीलाई नयाँ दिशा दिने सुझाव गरिएको छ ।

किरातीले यी पाँच विषयलाई ‘माओवादी पार्टी रूपान्तरणको एकमात्र विकल्प’का रूपमा प्रस्तुत गर्दै भनेका छन्, “यस्तो लिखित सहमति र प्रतिबद्धता बिना रूपान्तरण होइन, केवल रूप सजावट मात्र हुनेछ ।”