तुइनखोलामा निरन्तर पहिरो, नारायणघाट–मुग्लिन सडक अझै अवरुद्ध

चितवन । तुइनखोलामा निरन्तर ढुंगा खसिरहेकाले नारायणघाट–मुग्लिन सडक पन्छाउन सकस भइरहेको छ । शुक्रबार अपराह्नदेखि सुरु भएको पहिरो राति साढे ७ बजेदेखि सडक पूर्ण अवरुद्ध बनेको हो ।

सडक डिभिजन कार्यालय भरतपुरका अनुसार करिब ७० मिटर माथिबाट ढुंगा खसिरहेको छ । पहिरोले सडकमा करिब १६० मिटर लम्बाइ, १० मिटर चौडाइ र १६ मिटर उचाइमा गेग्रान जमेको छ ।

हाल सडक डिभिजनका दुईवटा लोडर र नेपाल प्रहरीले प्रयोगमा ल्याएको अर्को लोडर परिचालन गरेर सडक खोल्ने प्रयास भइरहेको जिल्ला ट्राफिक प्रहरी प्रमुख गायत्रिराज शर्माले जानकारी दिए । तर ढुंगा खस्ने क्रम अझै नरोकिएको उनले बताए ।

सडक डिभिजन कार्यालयले ढुंगा खस्ने क्रम रोकिएमा थप १० वटा यान्त्रिक उपकरण परिचालन गरी करिब ५ घण्टामा पहिरो पन्छाउन सकिने जनाएको छ ।

जिल्ला प्रशासन कार्यालयले सडक तत्काल खुल्ने सम्भावना कम भएकाले यात्रुहरुलाई वैकल्पिक बाटो प्रयोग गर्न अनुरोध गरेको छ ।