बानेश्वरमा झडप तीव्र, एकको मृत्यु पश्चात् स्थिति नियन्त्रणबाहिर

काठमाडौं । जेनजीको प्रदर्शनमा प्रहरीको गोली लागी एक प्रदर्शनकारीको मृत्यु भएपछि बानेश्वर क्षेत्र झनै तनावग्रस्त बनेको छ ।

सरकारले लगाएको कर्फ्यू आदेश प्रभावकारी नदेखिँदा आक्रोशित प्रदर्शनकारीहरूले विरोधलाई अझ तीव्र पारेका छन् । संसद् भवन वरिपरि ठूलो संख्यामा उनीहरूको भिड रहँदा वातावरण अशान्त भएको छ ।

प्रहरीले संसद् परिसर भित्रबाट पटक–पटक अश्रुग्यास प्रहार, रबरको गोली प्रक्षेपण, पानीको फोहोरा प्रयोग र इट्टासमेत प्रहार गरिरहेको छ । तर प्रदर्शनकारीहरूले पनि संसद् भवन वरिपरि आगजनी गर्ने प्रयास दोहोर्‍याउँदै भिडन्तलाई थप चर्काइरहेका छन् ।

भागदौडका क्रममा धेरै जना घाइते भएका छन् । उपचारका लागि विभिन्न अस्पतालमा पुर्‍याइएका घाइतेमध्ये कतिपयको अवस्था गम्भीर रहेको बताइएको छ ।