तीन नयाँ न्यायाधीशले शपथ लिए, आजैबाट कार्यभार सम्हाले

काठमाडौं । सर्वोच्च अदालतमा नियुक्त भएका तीन जना न्यायाधीशले पद तथा गोपनीयताको शपथ ग्रहण गरेका छन् ।

प्रधानन्यायाधीश प्रकाशमानसिंह राउतले मंगलबार आयोजित समारोहमा न्यायाधीश मेघराज पोखरेल, श्रीकान्त पौडेल र शान्तिसिंह थापालाई शपथ गराएका हुन् ।

तीनै जनालाई न्याय परिषद्को सिफारिसमा संसदीय सुनुवाइ समितिले अनुमोदन गरेपछि राष्ट्रपति रामचन्द्र पौडेलले सर्वोच्च अदालतको न्यायाधीशमा नियुक्त गरेका थिए ।

शपथ लिएलगत्तै उनीहरूले आजैदेखि आफ्नो जिम्मेवारी सम्हाल्न थालेका छन् ।

यससँगै, प्रधानन्यायाधीश राउतले न्याय परिषद्को सदस्यमा नियुक्त महेशकुमार नेपाललाई पनि पद तथा गोपनीयताको शपथ गराएका छन् । परिषद्का अध्यक्षसमेत रहेका प्रधानन्यायाधीशले संविधानबमोजिम नेपाललाई शपथ गराएका हुन् ।