भोटेकोसी नदीमा बाढीको बहाव बढेको सूचना, रसुवा–नुवाकोट–धादिङमा सतर्कता अपनाउन आग्रह

काठमाडौं । रसुवास्थित भोटेकोसी नदीमा बाढीको बहाव बढेको आवाज सुनिएको सूचना प्राप्त भएपछि नदी आसपासका क्षेत्रमा उच्च सतर्कता अपनाउन आग्रह गरिएको छ ।

राष्ट्रिय विपद् जोखिम न्यूनीकरण तथा व्यवस्थापन प्राधिकरणका अनुसार जिल्ला प्रशासन कार्यालय, रसुवाबाट आज (आइतबार) बिहान भोटेकोसी नदीमा बाढीको बहाव बढेको आवाज सुनिएको जानकारी आएको हो ।

प्राधिकरणले बिहानै सूचना जारी गर्दै रसुवा, नुवाकोट र धादिङका नदी आसपासका बस्ती तथा क्षेत्रमा विशेष सतर्कता अपनाउन आग्रह गरेको छ । साथै, घटनासम्बन्धी थप विवरण प्राप्त भएलगत्तै सार्वजनिक गर्दै जाने प्राधिकरणले जनाएको छ ।

बाढी पूर्वानुमान महाशाखाले पनि प्राधिकरणको उक्त सूचना सम्प्रेषण गर्दै नदी आसपासका बासिन्दालाई सावधानी अपनाउन आग्रह गरेको छ ।