सुनको भाउ तोलामा तीन लाख नाघ्यो, चाँदी पनि नयाँ रेकर्डमा

काठमाडौं । नेपाली बजारमा सुनको मूल्यले नयाँ इतिहास बनाएको छ । बिहीबारको तुलनामा तोलामा ९ हजार २ सय रुपैयाँ बढ्दै शुक्रबार सुनको मूल्य तीन लाख १ हजार ४ सय रुपैयाँ पुगेको नेपाल सुनचाँदी व्यवसायी महासंघले जनाएको छ । यो हालसम्मकै सबैभन्दा उच्च मूल्य हो ।

यसअघि बुधबार सुनको भाउ एकैदिन १० हजार ४ सय रुपैयाँले उकालो लागेको थियो । तर बिहीबार भने तोलामा २ हजार ९ सय रुपैयाँ घटेर दुई लाख ९२ हजार २ सय रुपैयाँमा झरेको थियो । त्यसपछि फेरि तीव्र वृद्धि हुँदै शुक्रबार सुनले तीन लाखको सीमा पार गरेको हो ।

पछिल्ला दिनहरूमा सुनको मूल्य निरन्तर उकालो लागिरहेको छ । गएको बुधबार तोलामा १० हजार ४ सय रुपैयाँ बढेर सुनको भाउ दुई लाख ९५ हजार १ सय रुपैयाँ पुगेको थियो । त्यसअघि मंगलबार तोलामा २ हजार ७ सय, सोमबार ४ हजार २ सय र आइतबार ६ सय रुपैयाँले मूल्य बढेको थियो । पछिल्ला ६ दिनमै सुनको भाउ तोलामा २७ हजार १ सय रुपैयाँले बढिसकेको छ ।

यसैबीच चाँदीको मूल्य पनि हालसम्मकै उच्च विन्दुमा पुगेको छ । शुक्रबार तोलामा ३ सय २० रुपैयाँ बढेर चाँदीको भाउ ६ हजार १ सय ९० रुपैयाँ कायम भएको महासंघले जनाएको छ ।