हालान्डको विश्वकप डेब्युमा दुई गोल, नर्वेको शानदार जित

काठमाडौं । फिफा विश्वकप २०२६ अन्तर्गत समूह ‘आई’ को खेलमा नर्वेले इराकलाई ४–१ गोलअन्तरले पराजित गर्दै प्रतियोगितामा प्रभावशाली सुरुआत गरेको छ । स्टार फरवार्ड एर्लिङ हालान्डले विश्वकप डेब्यु खेलमै दुई गोल गर्दै नर्वेको जितमा निर्णायक भूमिका खेले ।

खेलको २८औँ मिनेटमा हालान्डले गोल गर्दै नर्वेलाई अग्रता दिलाएका थिए । पहिलो हाफको ‘हाइड्रेसन ब्रेक’ लगत्तै भएको यो गोलले नर्वेलाई खेलमा बलियो बनाएको थियो ।

तर त्यसको १० मिनेटपछि इराकका कप्तान आयमेन हुसेनले शानदार हेडरमार्फत बराबरी गोल फर्काउँदै खेललाई १–१ को अवस्थामा पुर्‍याए ।

इराकको खुशी धेरैबेर टिक्न सकेन । ४२औँ मिनेटमा हालान्डले दोस्रो गोल गर्दै नर्वेलाई पुनः अग्रता दिलाए । यो गोल इराकका गोलरक्षक जलाल हसनको ठूलो गल्तीका कारण सम्भव भएको थियो ।

डिफेन्डरले गोलरक्षकतर्फ पास गरेको बल नियन्त्रण गर्न हसन अघि बढेनन् । त्यसको फाइदा उठाउँदै हालान्डले दबाब सिर्जना गरे र गोलरक्षकले हानेको बल उनैको शरीरमा लाग्दै गोलमा परिणत भयो ।

यो गोलसँगै २५ वर्षीय हालान्ड नर्वेका लागि सर्वाधिक गोलकर्ताको सूचीमा केटिल रेक्डालसँग संयुक्त रूपमा शीर्ष स्थानमा पुगे । उनले यो उपलब्धि केवल ४३ अन्तर्राष्ट्रिय खेलमै हासिल गरेका हुन् ।

दोस्रो हाफमा नर्वेले आफ्नो दबाब कायम राख्यो । खेलको ७५औँ मिनेटमा मार्टिन ओडेगार्डको कर्नरमा लियो ओस्टिगार्डले उत्कृष्ट हेडर गोल गर्दै नर्वेको अग्रता ३–१ मा पुर्‍याए ।

अतिरिक्त समयमा हालान्डको हेडर क्लियर गर्ने क्रममा इराकका आयमेन हुसेनबाट आत्मघाती गोल भएपछि नर्वेले ४–१ को सहज जित दर्ता गर्‍यो।

नर्वेले आफ्नो दोस्रो खेलमा जुन २३ मा सेनेगलसँग प्रतिस्पर्धा गर्नेछ ।