प्रधानमन्त्रीको सीमासम्बन्धी अभिव्यक्ति सच्याउन हर्क साम्पाङको माग

काठमाडौं । श्रम संस्कृति पार्टीका अध्यक्ष हर्क साम्पाङले प्रधानमन्त्री वालेन्द्र शाहले संसद्मा दिएको सीमासम्बन्धी अभिव्यक्ति सच्याउनुपर्ने बताएका छन् । उनले राष्ट्रिय सीमासँग जोडिएका विषय अत्यन्त संवेदनशील भएकाले त्यसबारे व्यक्त गरिएको भनाइ स्पष्ट र तथ्यपरक हुनुपर्ने बताएका हुन् ।

सोमबार प्रतिनिधि सभाको बैठकमा बोल्दै साम्पाङले प्रधानमन्त्रीले नेपालले पनि भारतको भूमि मिचेको भन्ने आशयको अभिव्यक्ति दिएकोप्रति आपत्ति जनाए । उनले सीमाको विषय राष्ट्रिय हितसँग प्रत्यक्ष सम्बन्धित भएकाले त्यसलाई सामान्य रूपमा लिन नहुने बताए ।

‘सीमाको विषय देशको सार्वभौमसत्तासँग जोडिएको प्रमुख मुद्दा हो । यसबारे व्यक्त गरिएको अभिव्यक्ति अविलम्ब सच्याइनुपर्छ,’ साम्पाङले संसद्मा भने ।

उनले प्रधानमन्त्रीले माफी माग्नुपर्नेभन्दा पनि आफ्नो भनाइ सच्याउनुपर्नेमा जोड दिए । गलत सन्देश जाने गरी अभिव्यक्ति आएको भए त्यसलाई स्पष्ट पार्न र अभिलेख सच्याउन आवश्यक रहेको उनको भनाइ थियो ।

साम्पाङले प्रधानमन्त्रीको भनाइ अरू कसैले आएर सच्याउने कुरा स्वीकार्य नहुने समेत बताए । संसद्मा व्यक्त गरिएको अभिव्यक्ति सम्बन्धित व्यक्तिले नै स्पष्ट पार्नुपर्ने उनको तर्क थियो ।

‘अरूले आएर स्पष्टीकरण दिने वा सच्याउने कुरा मान्य हुँदैन । प्रधानमन्त्रीले स्वयं संसद्मा उपस्थित भएर आफ्नो भनाइ सच्याउनुपर्छ,’ उनले भने ।