एमालेको निर्णय: पूर्वराष्ट्रपति भण्डारीको सदस्यता खुला गर्ने

काठमाडौं । नेपाल कम्युनिष्ट पार्टी (एमाले) ले पूर्वराष्ट्रपति विद्यादेवी भण्डारीको पार्टी सदस्यता पुनः खुला गर्ने निर्णय गरेको छ । सोमबार अध्यक्ष केपी शर्मा ओलीको भक्तपुरस्थित गुण्डु निवासमा बसेको एमाले सचिवालय बैठकले यस्तो निर्णय गरेको हो ।

बैठकपछि सञ्चारकर्मीसँग कुरा गर्दै उपमहासचिव लेखराज भट्टाले पूर्वराष्ट्रपति भण्डारीको सदस्यता खुला गर्ने निर्णय सचिवालयबाट पारित भएको जानकारी दिए । उनका अनुसार पार्टीको अर्को सचिवालय बैठक आगामी जेठ ८ गते बस्ने तय गरिएको छ ।

एमालेको विधानअनुसार राष्ट्रपतिको जिम्मेवारी सम्हालेका व्यक्तिको सक्रिय पार्टी सदस्यता स्वतः निष्क्रिय रहने व्यवस्था छ । भण्डारी राष्ट्रपतिको कार्यकाल पूरा गरेर सार्वजनिक राजनीतिक जीवनमा फर्किएपछि उनको भूमिकाबारे एमालेभित्र विभिन्न तहमा चर्चा हुँदै आएको थियो । पछिल्लो निर्णयलाई त्यसैको निरन्तरताका रूपमा हेरिएको छ ।

बैठकमा महासचिव शंकर पोखरेलले ११ वटा एजेन्डा प्रस्तुत गरेका थिए । ती एजेन्डामा पदाधिकारीको वरियताक्रम, पछिल्लो निर्वाचनको समीक्षा, सरकारको कामकारबाही, सदस्यता नवीकरण तथा विस्तार, पदाधिकारीको कार्यविभाजन, संविधान संशोधन कार्यदल गठनलगायत विषय समावेश रहेका थिए ।

यस्तै, पार्टी कार्यालय भवन निर्माण, केन्द्रीय कार्यालय व्यवस्थापन, नीति अध्ययन तथा अनुसन्धान प्रतिष्ठानको निर्देशक समिति गठन, संगठन विभागमा सदस्य मनोनयन तथा विविध विषयमा पनि बैठकमा छलफल भएको जनाइएको छ ।

एमालेले संगठन विस्तार र आन्तरिक संरचना सुदृढीकरणलाई प्राथमिकतामा राखेर विभिन्न निर्णय अघि बढाइरहेको जनाएको छ । आगामी बैठकमा प्रस्तुत एजेन्डामाथि थप विस्तृत छलफल हुने नेताहरूले बताएका छन् ।