सम्पत्ति शुद्धीकरण मुद्दामा रामबहादुर बमजन निर्दोष ठहर

काठमाडौं । ‘लिटिल बुद्ध’को नामले परिचित रामबहादुर बमजन सम्पत्ति शुद्धीकरण मुद्दामा पनि अदालतबाट सफाइ पाएका छन् ।

जिल्ला अदालत सर्लाहीका न्यायाधीश महेन्द्रराज काफ्लेको इजलासले बमजनविरुद्ध दायर गरिएको मुद्दामा अभियोग पुष्टि हुन नसकेको ठहर गर्दै सफाइ दिएको हो । अदालतले वैशाख ८ गते नै फैसला सुनाएको थियो ।

बमजनविरुद्ध ८ करोड ५९ लाख रुपैयाँ बराबरको बिगो दाबी गर्दै मुद्दा दायर गरिएको थियो । उक्त मुद्दामा उनी पुर्पक्षका लागि थुनामा रहेका थिए । फैसला पछि उनी कारागार कार्यालय सर्लाहीबाट रिहा भइसकेको प्रहरीले जनाएको छ ।

अनुसन्धानका क्रममा चितवनस्थित करिब ६४ लाख रुपैयाँ मूल्य बराबरको जग्गा तथा बरामद नगद रकमलाई आधार बनाएर मुद्दा दायर गरिएको थियो । नेपाल प्रहरीको केन्द्रीय अनुसन्धान ब्युरो (सिआइबी) ले लामो अनुसन्धानपछि उनलाई २०८० पुस २४ गते काठमाडौंबाट पक्राउ गरेको थियो । पक्राउका बेला उनीसँग विभिन्न १७ देशका मुद्रा गरी करिब ३० लाख ९२ हजार रुपैयाँ बराबर विदेशी रकम र ३ करोड ३४ लाख रुपैयाँ नेपाली नगद फेला परेको थियो ।

यद्यपि बमजनविरुद्धको बाल यौन दुरुपयोग सम्बन्धी मुद्दा भने अझै सर्वोच्च अदालतमा विचाराधीन छ । जिल्ला अदालत सर्लाहीले उक्त मुद्दामा २०८१ असार १७ गते उनलाई १० वर्ष कैद र पीडित बालिकालाई ५ लाख रुपैयाँ क्षतिपूर्ति भराउने फैसला गरेको थियो ।

पछि उच्च अदालत जनकपुरले २०८१ चैत ६ गते जिल्ला अदालतको फैसला उल्ट्याउँदै बमजनलाई सफाइ दिएको थियो । त्यस निर्णयविरुद्ध महान्यायाधिवक्ता कार्यालयले सर्वोच्च अदालतमा पुनरावेदन गरेपछि अहिले मुद्दा सर्वोच्चमा विचाराधीन रहेको छ ।