नयाँ दलको नाम ‘नेपाली कम्युनिस्ट पार्टी’, पाँचकुने तारा चिन्ह चयन

काठमाडौं । नेकपा (माओवादी केन्द्र) सहित नौ दलको एकताबाट बन्ने नयाँ राजनीतिक दलको नाम ‘नेपाली कम्युनिस्ट पार्टी’ राखिएको छ । माओवादी केन्द्रको महाधिवेशन आयोजक समितिको मंगलबार बसेको अन्तिम बैठकपछि प्रवक्ता अग्नि सापकोटाले उक्त निर्णय सार्वजनिक गरेका हुन् ।

यसअघि गत शुक्रबार आठ दलबीचको प्रारम्भिक सहमतिमा चुनाव चिन्ह पाँचकुने तारा तय भए पनि पार्टीको नाम टुंगो लाग्न बाँकी थियो । मंगलबारको छलफलपछि नाम र संरचनाबारे सहमति जुटेको सापकोटाले जानकारी दिए ।

उनका अनुसार नयाँ दलको एकता राष्ट्रिय सम्मेलन कात्तिक १९ गते हुनेछ । सो सम्मेलनमा सहभागी हुने प्रतिनिधिहरू सबै दलबीचको आपसी सहमति र समझदारीका आधारमा चयन गरिने छन् ।

“नयाँ दलको नाम नेपाली कम्युनिस्ट पार्टी हुनेछ, यसको चुनाव चिन्ह पाँचकुने तारा रहनेछ,” सापकोटाले भने, “एकता राष्ट्रिय महाधिवेशन भने आगामी छ महिनाभित्र सम्पन्न गरिनेछ ।”

उनले नयाँ पार्टीको केन्द्रीय समिति पनि आपसी सहमतिमा गठन गरिने उल्लेख गरे । प्रारम्भिक संरचनाअनुसार केन्द्रीय समिति र संगठनका सबै तहमा संयोजक र सह–संयोजकको व्यवस्था रहने छ ।

यससँगै लामो समयदेखि छलफलमा रहेको वाम एकताको प्रक्रिया औपचारिक रूपमा टुंगोमा पुगेको छ । राजनीतिक विश्लेषकहरूका अनुसार, ‘नेपाली कम्युनिस्ट पार्टी’ गठनले वामपन्थी शक्ति पुनः एक प्लेटफर्ममा ल्याउने प्रयासका रूपमा महत्वपूर्ण मोड लिन सक्छ ।