नेपालको विजयी सुरुवात, कुवेतमाथि ५८ रनको सानदार जित

काठमाडौं । नेपाली राष्ट्रिय क्रिकेट टोलीले आईसीसी टी–२० विश्वकप एसिया इस्ट प्यासिफिक छनोटमा प्रभावशाली सुरुवात गर्दै पहिलो खेलमा कुवेतलाई ५८ रनले पराजित गरेको छ ।

बुधबार राति ओमानको अल एमिरेट्स क्रिकेट मैदान टर्फ १ मा भएको खेलमा नेपालले १ सय ४१ रनको लक्ष्य दिएको थियो । जवाफी पारीमा कुवेत १८.१ ओभरमै ८३ रनमा समेटिएको हो । यो जितसँगै नेपालले समूह ‘बी’ मा महत्त्वपूर्ण २ अंक जोड्दै शीर्ष स्थानमा स्थान बनाएको छ ।

१५औँ ओभरमा सन्दीप लामिछानेले लगातार दुई विकेट लिँदै कुवेतलाई झनै दबाबमा राखे । उनले उक्त ओभरमा मेडन विकेट लिएर उत्कृष्ट प्रदर्शन गरे । सन्दीपसँगै कप्तान रोहित पौडेल र ललित राजवंशीले पनि समान २–२ विकेट लिए । सोमपाल कामी, नन्दन यादव र कुशल भुर्तेलले एक–एक विकेट लिए ।

कुवेतका ओपनर क्लिन्टो एन्टोले २६ रन बनाए भने यासिन पटेलले १९ र मति भास्करले ११ रन बनाए । अन्य ब्याटरले दोहोरो अंकको स्कोर बनाउन सकेनन् ।

टस हारेर पहिला ब्याटिङ गरेको नेपालले २० ओभरमा ७ विकेटको क्षतिमा १४१ रन बनाएको थियो । ओपनर कुशल भुर्तेलले ५६ बलमा ३ चौका र ३ छक्कासहित ६६ रन बनाए । दीपेन्द्र सिंह ऐरी र गुल्सन झाले समान २० रन बनाए । कप्तान रोहित पौडेलले १६ रनको योगदान दिए ।

अन्य खेलाडीहरू सन्दीप जोरा (५), कुशल मल्ल (४), सोमपाल कामी (१) र नन्दन यादव (२) ले कम स्कोर जोडे । नेपालले अन्तिम ओभरमा दुई विकेट गुमाएको थियो ।

कुवेतका नवीनराज राजेन्द्रनले २ विकेट लिए भने मोहम्मद आकिफ फारुक, अनुदिप चेन्थामारा र मोहम्मद अस्लामले एक–एक विकेट हात पारे ।

यो छनोट प्रतियोगितामा ९ टोली छन्, जसलाई तीन समूहमा विभाजन गरिएको छ । समूह ‘ए’मा मलेसिया, कतार र यूएई रहेका छन् भने समूह ‘बी’मा नेपाल, कुवेत र जापान रहेका छन् । त्यस्तै समूह ‘सी’ मा ओमान, पपुवा न्युगिनी र सामोआ छन् ।

प्रत्येक समूहबाट शीर्ष दुई टोली सुपर सिक्समा प्रवेश गर्नेछन् । सुपर सिक्सको शीर्ष ३ टोलीले सन् २०२६ मा हुने टी–२० विश्वकपको टिकट सुनिश्चित गर्नेछन् ।

नेपालले समूह चरणको दोस्रो खेलमा शुक्रबार जापानविरुद्ध खेल्ने तालिका छ ।