सरकारको दमनविरुद्ध देशव्यापी प्रदर्शन, नेताको निवासदेखि सरकारी कार्यालयसम्म निशानामा

काठमाडौं । सरकारको दमनमा १९ जनाको ज्यान जाने घटनापछि देशभर प्रदर्शन चर्किएको छ । आन्दोलनकारीहरूले सहरसहरका चोकमा टायर बालेर आक्रोश पोखिरहेका छन् ।

नेताहरूको निवासदेखि सरकारी कार्यालयसम्म आन्दोलनकारीको निशानामा परेका छन् । राजधानी काठमाडौं, भक्तपुर र ललितपुरलगायतका जिल्लामा कर्फ्यू तोड्दै प्रदर्शन जारी छ । चोकचोकमा टायर बालेर सरकारविरुद्ध नाराबाजी भइरहेका छन् ।

मंगलबार बिहानै ललितपुरको सुनाकोठीस्थित सञ्चारमन्त्री पृथ्वी सुब्बा गुरुङको घरमा आन्दोलनकारीले आगजनी गरेका छन् । त्यस्तै, माओवादी केन्द्रका अध्यक्ष पुष्पकमल दाहाल ‘प्रचण्ड’को खुमलटारस्थित निवासमा तोडफोड भएको छ भने निवास नजिकै रहेको प्रहरी बिटमा समेत आगजनी गरिएको छ ।

राजधानीबाहिर पनि आन्दोलन तीव्र बनेको छ । रौतहटको चन्द्रपुर नगरपालिकामा मंगलबार आगजनी भएको छ । यसअघि सोमबार सुनसरीको इटहरी नगरपालिकामा आन्दोलनकारीहरूले सरकारी संरचनामा आगजनी गरेका थिए ।

देशभर फैलिएको प्रदर्शनसँगै असन्तुष्टि अझ उग्र बन्दै गएको छ । सुरक्षाकर्मीको कडा निगरानीबीच पनि आन्दोलनकारीले कर्फ्यू तोडेर सडकमा उपस्थिति जनाइरहेका छन् ।