चियुवानमा ‘महान् संस्कृति तथा कला सप्ताह’ भव्य रूपमा प्रारम्भ

चियुवान, चीन । चीनको चियुवान शहरमा पहिलो पटक ‘महान् संस्कृति तथा कला सप्ताह’ र ‘बाँदर राजा प्रतियोगिता’ भव्य रूपमा सुरु भएको छ । ‘चीनको बाँदर पर्वत, चियुवानको सांस्कृतिक शोभा’ नारासहित सुरु गरिएको यस महोत्सवले चिनियाँ परम्परागत संस्कृति, कला र पर्यटनलाई अन्तर्राष्ट्रिय स्तरमा प्रवर्द्धन गर्ने उद्देश्य राखेको आयोजकहरूले जनाएका छन् ।

उद्घाटन समारोहमा परम्परागत बाँदर नाच, युद्धकला र आधुनिक नृत्यका आकर्षक प्रस्तुति प्रदर्शित भए । करिब ३०० जना ‘सुन्दर बाँदर राजा’ प्रतिस्पर्धीहरूको सामूहिक उपस्थिति कार्यक्रममा विशेष आकर्षण बनेको थियो। कार्यक्रममा चीन–नेपाल सांस्कृतिक दूत तथा चर्चित कलाकार लियु स्याओलिङथोङको सहभागिता दर्शकका लागि अर्को चासोको विषय रह्यो ।

चीन–नेपाल सांस्कृतिक सम्बन्धको झलक
यस महोत्सवको विशेषता भनेको चीनको बाँदर पर्वत र नेपालको स्वयम्भूनाथ बाँदर मन्दिरबीच गरिएको भिडियो संवाद हो । यस संवादमार्फत दुवै मुलुकबीच ‘वानर’ प्रतीकको साझा सांस्कृतिक र आध्यात्मिक सम्बन्धलाई उजागर गरिएको थियो । नेपालका पूर्वराजदूतहरू लीलामणि पौडेल, टंक कार्की र विष्णुपुकार श्रेष्ठले कार्यक्रमलाई शुभकामना सन्देश पठाएका थिए । उनीहरूले बुद्ध, महामञ्जुश्री, कन्फ्युसियस, फासियान र ह्वेनसाङ जस्ता ऐतिहासिक व्यक्तित्वहरूको योगदानले नेपाल–चीन मित्रता अझ गहिरो भएको उल्लेख गरे ।

त्यस्तै, धुलिखेल नगरपालिकाका पूर्व उपमेयर सुवासकाजी श्रेष्ठले स्वयम्भूनाथ महाचैत्य र चीनको बाँदर पर्वतलाई २५०० वर्षको बौद्ध ज्ञान र संस्कृतिको प्रतीक भन्दै बाँदरले मानव, प्रकृति र आध्यात्मिकताको सन्तुलनलाई प्रतिविम्बित गर्ने धारणा राखे ।

नयाँ सांस्कृतिक केन्द्रको शुभारम्भ
कार्यक्रमको अवसरमा ‘पश्चिम यात्रा सांस्कृतिक आदानप्रदान केन्द्र’ को उद्घाटनसमेत गरिएको छ । यस केन्द्रमार्फत चीन र अन्य मुलुकबीच कला, साहित्य र सांस्कृतिक गतिविधिको निरन्तर आदानप्रदान हुने अपेक्षा गरिएको छ ।

लियु स्याओलिङथोङले आफ्नो प्रसिद्ध पात्र ‘सुन वुकोंग’को पोशाकमा ३०० जना प्रतिस्पर्धी बाँदर राजासँगै सामूहिक उपस्थित भएर विश्व कीर्तिमान कायम गरेका छन् । यसले महोत्सवलाई अझै ऐतिहासिक बनाएको आयोजकहरूको भनाइ छ ।

सप्ताहव्यापी सांस्कृतिक कार्यक्रम
महोत्सव सेप्टेम्बर २७ सम्म चल्नेछ । यस अवधिमा लोककथा वाचन, कला प्रदर्शनी, विद्यालयस्तरीय प्रतियोगिता, अन्तर्राष्ट्रिय सांस्कृतिक संवाद तथा पर्यटन प्रवर्द्धनका गतिविधि आयोजना हुनेछन् । आयोजकहरूले यस कार्यक्रममार्फत चियुवानलाई सांस्कृतिक नवप्रवर्तन र अन्तर्राष्ट्रिय आदानप्रदानको केन्द्रका रूपमा स्थापित गर्ने विश्वास व्यक्त गरेका छन् ।

स्थानीय बासिन्दा र पर्यटकहरूले महोत्सवलाई सांस्कृतिक विविधता बुझ्ने, अन्तर्राष्ट्रिय मित्रता बढाउने र पर्यटनमा नयाँ सम्भावना खोल्ने अवसरका रूपमा लिएका छन् ।