काठमाडौं प्रहरी नेतृत्वमा व्यापक हेरफेर, थापा नयाँ प्रमुख

काठमाडौं । जिल्ला प्रहरी परिसर काठमाडौंको नेतृत्वमा ठूलो फेरबदल भएको छ । प्रहरी महानिरीक्षकको सचिवालयमा कार्यरत प्रहरी वरिष्ठ उपरीक्षक (एसएसपी) रमेश थापालाई काठमाडौंको प्रमुखको जिम्मेवारी दिइएको छ ।

गृहमन्त्रीको बिहीबारको निर्णयअनुसार थापा अब काठमाडौं परिसरको नेतृत्व सम्हाल्ने छन् । यसअघि काठमाडौं प्रहरी प्रमुख रहेका एसएसपी विश्वराज अधिकारीलाई प्रहरी प्रधान कार्यालयमा सरुवा गरिएको छ ।

जेन–जी आन्दोलनमा २३ गते भएको अत्यधिक बल प्रयोगपछि प्रहरीमाथि चर्को आलोचना भइरहेका बेला एसएसपी, एसपी र डीएसपी तहका अधिकृतहरू व्यापक रूपमै हेरफेर गरिएका हुन् ।

थापा यसअघि उदयपुर र कास्कीमा प्रहरी प्रमुखका रूपमा काम गरिसकेका अनुभवी अधिकृत हुन् । उनी आफ्नो ब्याचका पहिलो नम्बरका एसएसपीसमेत हुन् ।

यसअघि बुधबार नै काठमाडौँ परिसरका एसपी अपीलराज बोहरा र कुलदीप चन्दलाई अन्यत्र पठाइएको थियो । उनीहरूको स्थानमा एसपी पवन भट्टराईलाई ल्याइएको छ ।

यस्तै, डीएसपी सुन्दर तिवारी पनि सरुवा भएका छन् भने काठमाडौंका झण्डै आधा वृत्त प्रमुख परिवर्तन गरिएका छन् । परिसरका अन्य केही डीएसपीहरूको सरुवा प्रक्रिया पनि अघि बढिरहेको जनाइएको छ ।