कांग्रेस नेताहरूको असन्तुष्टिः “सामाजिक सञ्जाल बन्द गर्ने निर्णय अभिव्यक्ति स्वतन्त्रतामाथि प्रहार”

काठमाडौं । नेपाली कांग्रेसको कार्यसम्पादन समितिको बैठकमा सरकारले फेसबुकसहितका सामाजिक सञ्जाल बन्द गर्ने निर्णयप्रति नेताहरूले कडा आपत्ति जनाएका छन् ।

आइतबार बिहान सभापति शेरबहादुर देउवाको निवासमा बसेको बैठकमा नेताहरूले अभिव्यक्ति स्वतन्त्रता खोस्ने खालको सरकारी कदमप्रति गम्भीर चिन्ता व्यक्त गर्दै तत्काल छलफल आवश्यक रहेको निष्कर्ष निकाले ।

सहमहामन्त्री जीवन परियारका अनुसार बैठकले सामाजिक सञ्जाल बन्द गर्ने विषयमा सरकारसँग आधिकारिक छलफल गर्ने निर्णय गरेको छ । बैठकमा सहभागी पर्यटनमन्त्री बद्री पाण्डे भने चीनमा रहँदा निर्णय भएकाले तत्काल धारणा दिन नसकेको जनाइएको छ । अन्य मन्त्रीहरुसँग परामर्श गरी पार्टीको आधिकारिक धारणा सार्वजनिक गर्ने तयारी बैठकमा भएको एक नेताले बताए ।

सरकारले सूचीकृत हुन गरेको आह्वान नटेरेका सामाजिक सञ्जाललाई भदौ १९ गतेदेखि बन्द गर्ने घोषणा गरेको थियो । तर कांग्रेस नेताहरूले यस्तो निर्णयमा आपत्ति जनाउँदै प्रश्न उठाएका छन् ।

बैठकमा महामन्त्री गगन थापा, नेताहरू विमलेन्द्र निधि, गोपालमान श्रेष्ठ, अर्जुननरसिंह केसी, बालकृष्ण खाण, महेन्द्र यादवलगायतले विचार राखेका थिए । उनीहरूले अभिव्यक्ति स्वतन्त्रता संकुचित गर्ने कदमलाई पार्टीले स्वीकार गर्न नसक्ने स्पष्ट पारे ।