रुपन्देही–३ उपनिर्वाचनः २६ दललाई निर्वाचन चिन्ह तोकियो

काठमाडौं । रुपन्देही क्षेत्र नं. ३ मा आगामी कात्तिक १७ गते हुने प्रतिनिधि सभा सदस्यको उपनिर्वाचनका लागि निर्वाचन आयोगले सहभागी २६ राजनीतिक दललाई निर्वाचन चिन्ह उपलब्ध गराएको छ । आयोगले शनिबार राजपत्रमा सूचना प्रकाशित गर्दै दर्ता भएका दललाई संविधान र प्रचलित कानुनअनुसार चिन्ह तोकेको हो ।

नेपालको संविधानको धारा २७१ र राजनीतिक दल सम्बन्धी ऐन, २०७३ को दफा ४८ बमोजिम आयोगले उपनिर्वाचन प्रयोजनका लागि दल दर्ता र चिन्ह तोक्ने प्रक्रिया पूरा गरेको जनाएको छ । प्रतिनिधि सभा सदस्य निर्वाचन ऐन, २०७४ को दफा ३१ को उपदफा (१) अनुसार दललाई निर्वाचन चिन्ह प्रदान गरिएको आयोगका सचिव महादेव पन्थले जानकारी दिए ।

सूचना अनुसार, प्रमुख दलहरूमध्ये नेकपा (एमाले)ले सूर्य, नेपाली कांग्रेसले रुख, नेकपा (माओवादी केन्द्र)ले गोलाकारभित्र हँसिया–हथौडा, राष्ट्रिय स्वतन्त्र पार्टी (रास्वपा)ले घण्टी, राष्ट्रिय प्रजातन्त्र पार्टी (राप्रपा)ले हलो, जनमत पार्टीले लाउडस्पिकर, र एकीकृत समाजवादीले कलम पाएका छन् ।

त्यस्तै, राष्ट्रिय जनमोर्चालाई गिलास, मंगोल नेशनल अर्गनाइजेशनलाई कुखुराको भाले, नेपालका लागि नेपाली पार्टीलाई गोलाकारभित्र शङ्ख, राष्ट्रिय मुक्ति आन्दोलनलाई षट्कोण, जनता समाजवादी पार्टी (जसपा)लाई गोलाकारभित्र मुठ्ठी तोकिएको छ ।

यसबाहेक, जनप्रजातान्त्रिक पार्टी नेपाललाई गैँडा, नेपाल जनमुक्ति पार्टीलाई घर, हाम्रो नेपाली पार्टीलाई लौरो र बहुजन शक्ति पार्टीलाई जग प्रदान गरिएको आयोगले जनाएको छ । बाँकी दलले पनि आ–आफ्नो निर्वाचन चिन्ह पाइसकेका छन् ।