प्रचण्डको आरोपः ‘पार्टीलाई फुटाउने षड्यन्त्र तीव्र, प्रतिक्रियावादीसँग अन्तिम लडाइँ बाँकी’

काठमाडौं । नेकपा (माओवादी केन्द्र) का अध्यक्ष पुष्पकमल दाहाल ‘प्रचण्ड’ले पार्टीलाई विभाजित पार्न प्रतिक्रियावादी शक्तिहरू सक्रिय रूपमा षड्यन्त्रमा लागेको आरोप लगाएका छन् । आइतबार काठमाडौंको पेरिसडाँडास्थित पार्टी केन्द्रीय कार्यालयमा आयोजित २३औँ बोत्ले स्मृति दिवसका अवसरमा बोल्दै प्रचण्डले यस्तो दाबी गरेका हुन् ।

उनले शान्ति प्रक्रियामा प्रवेश गरेदेखि नै माओवादी आन्दोलनमाथि लगातार षड्यन्त्र र हमला भइरहेको उल्लेख गरे । “हामी शान्ति सम्झौतामा आएका दिनदेखि नै विभाजन, छलकपट र लगानीसहितको षड्यन्त्र चलिरहेको छ,” उनले भने, “प्रतिक्रियावादी शक्तिहरू पार्टी फुटाउन मरिमत्त परेका छन् ।”

उनको भनाइमा अहिलेको अवस्था ‘अन्तिम मुठभेड’को हो — जहाँ क्रान्तिकारीहरूले एकताबद्ध भएर प्रतिक्रियावादीका विरुद्ध निर्णायक संघर्ष गर्नुपर्ने बेला आएको छ । उनले क्रान्तिकारी कम्युनिस्ट शक्तिहरूबीच एकता आवश्यक रहेको दोहोर्याए ।

‘सहिद अपमान गर्ने प्रयास हुँदैछ’
प्रचण्डले प्रतिक्रियावादी शक्तिहरूमाथि सहिदहरूको योगदानलाई अवमूल्यन गर्ने र इतिहासलाई मेट्ने प्रयास गरिरहेको गम्भीर आरोप पनि लगाए । “त्यही तत्त्वहरूले महिला माथिको बलात्कार, यातना र हत्याका नृशंस अपराध गरे — आज पनि उनीहरू क्रान्तिकारी विरुद्ध षड्यन्त्रमा लागिरहेका छन्,” उनले भने ।

उनका अनुसार पछिल्लो केन्द्रीय समिति बैठकले पनि सहिद, बेपत्ता तथा घाइते योद्धाहरूको योगदानलाई गम्भीर रूपमा समीक्षा गरेको छ र पार्टीभित्रै त्यसप्रति चित्तबुझ्दो सम्मान नदेखिएको आत्मस्वीकृति भएको छ ।

‘नयाँ आन्दोलनको सङ्केत’
प्रचण्डले बोत्ले हत्याकाण्डको स्मृतिमा आयोजित कार्यक्रममा नयाँ आन्दोलनको आवश्यकता र तयारीको सङ्केतसमेत दिए । “हामी फेरि नयाँ आन्दोलन र विद्रोहतर्फ अघि बढिरहेका छौं,” उनले भने, “यो सङ्कल्पको यात्रालाई बोत्ले घटनाले अझ सशक्त बनाउनेछ ।”

उनका अनुसार जारी स्थायी समिति बैठकमा पनि पार्टी एकतालाई मजबुत बनाउने, विगतका अनुभवको मूल्याङ्कन गर्ने र अग्रगामी यात्राको योजना तय गर्ने विषयमा गम्भीर छलफल भइरहेको छ ।