प्रधानमन्त्री ओलीको शुभकामनाः “जीवन खीरजस्तै मिठासपूर्ण होस्”

काठमाडौं । साउन १५ को पारम्परिक पर्वको अवसरमा प्रधानमन्त्री केपी शर्मा ओलीले नेपाली जनतालाई खीरजस्तै मिठासपूर्ण जीवनको शुभकामना दिएका छन् ।

सामाजिक सञ्जालमार्फत शुभकामना सन्देश दिँदै उनले साउन १५ को सांस्कृतिक र ऐतिहासिक पृष्ठभूमिबारे पनि प्रकाश पारेका छन् ।

“आज साउन १५, खीर खाने परम्परागत पर्व,” ओलीले लेखेका छन्, “हाम्रा पूर्वजहरूले रोपाइँ सकेपछि यो पर्व मनाउन सुरु गरेका थिए, जसको गहिरो सम्बन्ध पुरानो पशुपालन संस्कृतिसँग पनि छ ।”

शुभकामना सन्देशमा ओलीले साउन १५ लाई नेपाली समाजको सामूहिकता, सद्भाव र सांस्कृतिक पहिचानको प्रतीकका रूपमा चित्रण गरेका छन् । “जसरी खीर मिठासपूर्ण परिकार हो, त्यसरी नै यो पर्वले नेपाली समाजमा संस्कृति र सौहार्दता मिसाउँछ,” उनले लेखेका छन् ।

सन्देशको अन्त्यमा उनले सबै नेपालीको जीवनमा मिठास र समृद्धिको कामना गर्दै भनेका छन्, “शुभ साउन १५ ! सबैको जीवन खीरजस्तै मिठासपूर्ण होस् !”