एसियन कप छनोटः नेपाल आज श्रीलंकासँग खेल्दै

काठमाडौं । एएफसी महिला एसियन कप फुटबलको छनोट चरणमा नेपाली राष्ट्रिय टोलीले आज दोस्रो खेल खेल्दैछ । समूह ‘एफ’ अन्तर्गतको यो प्रतिस्पर्धामा नेपालले श्रीलंकासँग प्रतिस्पर्धा गर्न लागेको हो ।

उज्बेकिस्तानको मैदानमा साँझ ६ः१५ बजे सुरु हुने यो खेलमा नेपाल लगातार दोस्रो जितको खोजीमा हुनेछ । पहिलो खेलमा लाओसलाई ९–० ले हराउँदै उच्च मनोबल बनाएको नेपाली टोली आजको खेल जित्दै एसियन कप नजिक पुग्ने लक्ष्यमा छ ।

त्यस्तै, श्रीलंकाले आफ्नो पहिलो खेलमा आयोजक उज्बेकिस्तानसँग १०—० को लज्जास्पद हार व्यहोरेको थियो । त्यसैले उनीहरू पहिलो जित निकाल्न लागि खेल्नेछन् ।

नेपाल र श्रीलंकाबीच यसअघि ८ पटक भिडन्त भएको छ, जसमा सबै खेल नेपालले जितेको इतिहास छ । त्यसैले नेपालले आज पनि विजयको परम्परा कायम राख्न चाहन्छ ।

समूह विजेता बन्न सके, नेपालले सन् २०२६ को मार्चमा अष्ट्रेलियामा हुने एएफसी महिला एसियन कपमा स्थान पाउनेछ ।

हालको छनोट चरणमा एशियाका ३४ टोली सहभागी छन्, जसलाई ८ समूहमा विभाजन गरिएको छ । अहिलेसम्म आयोजक अष्ट्रेलियासँगै चीन, दक्षिण कोरिया र जापानले मुख्य प्रतियोगितामा स्थान सुरक्षित गरिसकेका छन् । कुल १२ टोली अन्तिम चरणमा प्रतिस्पर्धा गर्नेछन् ।