नेपालको शानदार प्रदर्शन, इन्डोनेशिया ३७० रनले पराजित

काठमाडौं । एसीसी यू–१६ इस्ट जोन क्रिकेट प्रतियोगितामा नेपालले आफ्नो अपराजित यात्रा कायम राख्दै लगातार तेस्रो जित हात पारेको छ । आइतबार सम्पन्न खेलमा नेपालले इन्डोनेशियालाई एकतर्फी मुकाबलामा ३७० रनले पराजित गरेको हो ।

पहिलो ब्याटिङमा नेपालले निर्धारित ४० ओभरमै ५ विकेट गुमाउँदै ४२१ रनको विशाल स्कोर बनायो । नेपालका ओपनर प्रसिद्ध जैशीले १३२ रनको शतकीय इनिङ्स खेले । त्यस्तै, परिमार्जन यादवले ७१, रौनक श्रीवास्तवले ८८ र जोय थापाले ५७ रनको महत्वपूर्ण योगदान दिए ।

जवाफी ब्याटिङमा उत्रिएको इन्डोनेशियाको पारी टिक्न सकेन । नेपालले २४.३ ओभरमै विपक्षी टोलीलाई ५० रनमा समेट्यो । बलिङतर्फ नेपालका लागि विपिन शर्माले जबरजस्त प्रदर्शन गर्दै ७.३ ओभरमा मात्र १२ रन खर्चेर ६ विकेट झारे ।

नेपाल अब प्रतियोगिताको सेमिफाइनलतर्फ बलियो स्थितिमा पुगेको छ ।