सातौं सगरमाथा म्युजिक अवार्ड २०८२ का लागि आवेदन खुला

काठमाडौं । सगरमाथा म्युजिक अवार्डको सातौं संस्करण २०८२ मा आयोजना गरिने भएको छ । अवार्डको आयोजनाका लागि आवेदन खुला भएको अर्थ नेपाल प्रालिले जनाएको छ ।

‘नेपाली कला र स्रष्टाको सम्मान, नेपाली संस्कृति संरक्षण र प्रवर्द्धन हाम्रो अभियान’ भन्ने मूल नाराका साथ सञ्चालन हुने यस अवार्डमा २०८१ सालको वैशाखदेखि चैतसम्म बजारमा सार्वजनिक भएका गीत–संगीतले भाग लिन सक्ने संयोजक मनोज थापाले जानकारी दिए ।

यसअघि सगरमाथा म्युजिक अवार्डका ६ संस्करणहरू भव्य रूपमा सम्पन्न भइसकेका छन् । सातौं संस्करणमा राष्ट्रिय, चलचित्र, आधुनिक, लोकदोहोरी, पप र आधुनिक विधासहित विभिन्न विधामा देशभरका स्रष्टा, कलाकारहरूले सहभागिता जनाउन सक्नेछन् ।

अवार्ड कार्यक्रममा नेपाली गीत–संगीतमा दीर्घ योगदान दिएका एकजना विशिष्ट व्यक्तिलाई लाइफ टाइम एचिभमेन्ट अवार्ड प्रदान गरिनेछ । त्यस्तै, कला क्षेत्रलाई समर्पित रहेर कलम चलाउँदै आएका पत्रकारहरूलाई पनि सम्मान गरिने आयोजकले जनाएको छ ।

अवार्ड अन्तर्गत एकजना अग्रज रंग पत्रकारलाई नगद राशिसहित ‘रजत पत्रकारिता सम्मान’ प्रदान गरिने छ ।

सगरमाथा म्युजिक अवार्डमा भाग लिन चाहने इच्छुक कलाकारहरूले आवेदन फारम अवार्डको आधिकारिक वेबसाइटबाट भर्न सक्ने व्यवस्था गरिएको छ ।