क्लब विश्वकपमा इन्टर मियामीको ऐतिहासिक यात्रा, नकआउट चरणमा पीएसजीसँग भिडन्त

काठमाडौं । लियोनल मेस्सीको कप्तानीमा रहेको इन्टर मियामीले फिफा क्लब विश्वकप २०२५ मा नयाँ इतिहास रच्दै नकआउट चरणमा प्रवेश गरेको छ ।

मंगलबार बिहान हार्ड रक स्टेडियममा ब्राजिलको पाल्मिराससँग २–२ को रोमाञ्चक बराबरी खेलेसँगै इन्टर मियामी समूह ए को उपविजेता बन्दै अन्तिम १६ मा प्रवेश गरेको हो। यससँगै मियामी क्लब विश्वकपको नकआउट चरणमा पुग्ने पहिलो एमएलएस टोली बन्यो ।

अब इन्टर मियामीले फ्रान्सेली दिग्गज पेरिस सेन्ट–जर्मेन (पीएसजी) सँग आइतबार एटलान्टाको मर्सिडिज–बेन्ज स्टेडियममा प्रतिस्पर्धा गर्नेछ । उल्लेखनीय छ, पीएसजी युइएफए च्याम्पियन्स लिगको पूर्व विजेता हो ।

अग्रता जोगाउन नसकेपछि पीएसजीसँग भिडन्त
मियामीले खेलको सुरुवाती ६५ मिनेटसम्म २–० को स्पष्ट अग्रता लिएको थियो । खेलको १६औँ मिनेटमा लुइस सुवारेजको पासमा तादेओ एलेन्डेले पहिलो गोल गरे । त्यसपछि ६५ औँ मिनेटमा सुवारेजकै प्रयासमा दोस्रो गोल गर्दै मियामीले ब्राजिलियन क्लबलाई दवावमा राखेको थियो ।

तर दोस्रो हाफमा पुनःजागृत बनेको पाल्मिरासले ८०औँ मिनेटमा पाउलिन्होको गोलमार्फत खेलमा फर्कने संकेत गर्‍यो । त्यसपछि ८७औँ मिनेटमा मौरिसिओले बराबरी गोल गर्दै पाल्मिरासलाई समूह विजेता बनायो ।

यस परिणामपछि समूह ए को दोस्रो स्थानमा रहँदै इन्टर मियामीले समूह बी विजेता पीएसजीको सामना गर्ने निश्चित भएको हो ।

पूर्व क्लबविरुद्ध मेस्सी
इन्टर मियामीका लागि यो खेल विशेष रहनेछ — किनभने कप्तान लियोनल मेस्सीले सन् २०२३ मा पीएसजीबाट सम्झौता सकिएपछि इन्टर मियामीमा अनुबन्ध भएका थिए । अब उनी आफ्नै पूर्व क्लबविरुद्ध निर्णायक खेल खेल्न उत्रन लागेका छन् ।