मारवाडी प्रिमियर लिगको उपाधि वीरगञ्ज बासर्सको पोल्टामा

वीरगञ्ज । वीरगञ्जमा सम्पन्न मारवाडी प्रिमियर लिग क्रिकेट प्रतियोगिताको उपाधि वीरगञ्ज बासर्सले जितेको छ । बुधबार राति आर्दशनगर रङ्गशालामा सम्पन्न फाइनल खेलमा वीरगञ्ज बासर्सले टाइटन–११ लाई ६ विकेटले पराजित गर्दै उपाधि उचालेको हो ।

पहिले ब्याटिङ गरेको टाइटन–११ ले निर्धारित १५ ओभरमा ४ विकेट गुमाउँदै ७५ रन बनाएको थियो । त्यसपछि जवाफी ब्याटिङमा उत्रिएको बासर्सले ७.३ ओभरमै चार विकेटको क्षतिमा ७८ रन जोड्दै सहज जित हात पारेको हो ।

विजेता टिमलाई नगद रु २ लाख ५१ हजारसहित प्रमाणपत्र प्रदान गरिएको छ भने उपविजेता टाइटन–११ ले नगद रु २ लाख र प्रमाणपत्र प्राप्त गरेको छ ।

उपाधि विजेता र उपविजेता टोलीलाई वीरगञ्ज महानगरका प्रमुख राजेशमान सिंह तथा पर्साका प्रमुख जिल्ला अधिकारी गणेश अर्यालले पुरस्कार वितरण गरेका थिए ।