बाढीपीडितलाई होच्याउने भिडियो सामाजिक सञ्जालमा राखेको आरोपमा युवक पक्राउ

काठमाडौं । बाढी तथा विपद्बाट प्रभावित व्यक्तिहरूलाई लक्षित गरी अपमानजनक सामग्री सामाजिक सञ्जालमा पोस्ट गरेको आरोपमा प्रहरीले एक युवकलाई पक्राउ गरेको छ ।

पक्राउ पर्नेमा बैतडीको सुर्नया गाउँपालिका–७ घर भई हाल काठमाडौंको चन्द्रागिरी नगरपालिका–१२ मा बस्दै आएका २४ वर्षीय वीरेन्द्र मडै रहेका छन् । उनलाई नेपाल प्रहरीको केन्द्रीय साइबर ब्यूरो, भोटाहिटीको टोलीले पक्राउ गरेको हो ।

प्रहरीका अनुसार उनले भोटेकोशी बाढीपीडितसँगै विभिन्न जातजातिलाई लक्षित गरी होच्याउने तथा अपमानजनक अभिव्यक्ति समेटिएका भिडियो सामाजिक सञ्जालमा प्रसार गरेका थिए । विपत्तिका बेला पीडितप्रति संवेदनाहीन ढंगले खुसी व्यक्त गरेको देखिने सामग्रीसमेत उनले पोस्ट गरेको प्रहरीको भनाइ छ ।

पक्राउ परेका मडैविरुद्ध साइबर कसुरअन्तर्गत अनुसन्धान अघि बढाइएको प्रहरीले जनाएको छ ।