वैदेशिक रोजगारको निहुँमा ठगी, चार जना पक्राउ

काठमाडौं । विदेशमा रोजगारीको झुटो आश्वासन दिँदै लाखौं रुपैयाँ ठगी गरेको आरोपमा चार व्यक्तिलाई प्रहरीले पक्राउ गरेको छ ।

पक्राउ पर्नेमा स्याङजाका ६० वर्षीय लक्ष्मण चापागाईँ, सप्तरीका ३९ वर्षीय अशोक मण्डल, सिन्धुपाल्चोकका २० वर्षीय बाल सुन्दर भारती र २७ वर्षीया चण्डिका उप्रेती रहेका छन् । सबै आरोपीहरू हाल काठमाडौं उपत्यकाका विभिन्न स्थानमा बसोबास गर्दै आएका थिए ।

प्रहरीका अनुसार उनीहरूले आकर्षक तलब र सुविधा देखाएर बेरोजगार युवायुवतीलाई विभिन्न देशमा रोजगारीको झुटो सपना देखाउँदै रकम उठाएका थिए । लक्ष्मण चापागाईँले युके पठाउने भन्दै ५ लाख, अशोक मण्डलले मलेसिया पठाउने भन्दै ६ लाख, बाल सुन्दर भारतीले पोर्चुगलका लागि ३ लाख र चण्डिका उप्रेतीले न्यूजिल्याण्ड पठाउने भन्दै ५० हजार रुपैयाँ लिएको आरोप छ ।

पीडितहरूका उजुरीका आधारमा काठमाडौं उपत्यका अपराध अनुसन्धान कार्यालयबाट खटिएको टोलीले उनीहरूलाई उपत्यकाका विभिन्न स्थानबाट पक्राउ गरेको हो ।

पक्राउ परेका चारै जनालाई थप अनुसन्धान तथा कानुनी प्रक्रिया अघि बढाउन वैदेशिक रोजगार विभाग, ताहाचलमा बुझाइएको प्रहरीले जानकारी दिएको छ ।