‘गफ होइन काम, भाषण होइन परिणाम’ नारासहित उज्यालो नेपाल पार्टीको घोषणापत्र सार्वजनिक

काठमाडौं । उज्यालो नेपाल पार्टी (उनेपा) ले प्रतिनिधिसभा निर्वाचन लक्षित गर्दै आफ्नो प्रतिबद्धता पत्र सार्वजनिक गरेको छ । राजधानीमा आइतबार आयोजित कार्यक्रममा ‘गफ होइन काम, भाषण होइन परिणाम’ भन्ने मूल नारासहित घोषणापत्र सार्वजनिक गर्दै पार्टीले शासकीय सुधार, भ्रष्टाचार नियन्त्रण र आर्थिक समृद्धिलाई प्रमुख प्राथमिकतामा राखेको जनाएको छ ।

घोषणापत्रमा शासकीय संरचनामा परिवर्तन आवश्यक रहेको उल्लेख गर्दै प्रदेश तहमा स्थायित्वका लागि प्रत्यक्ष निर्वाचित मुख्यमन्त्रीको व्यवस्था प्रस्ताव गरिएको छ । साथै, राज्यको खर्च घटाउने उद्देश्यले सङ्घीय सांसदको संख्या हालको २७५ बाट २०१ र प्रदेश सांसदको संख्या ५५० बाट ३३० मा सीमित गर्ने तथा मन्त्रालयको संख्या पनि घटाउने योजना अघि सारिएको छ ।

भ्रष्टाचार नियन्त्रणलाई मुख्य एजेन्डा बनाएको पार्टीले शून्य सहनशीलताको नीति अवलम्बन गर्ने जनाएको छ । भ्रष्टाचारमा संलग्न व्यक्तिलाई सार्वजनिक पदमा आजीवन प्रतिबन्ध लगाउने र अवैध सम्पत्ति राष्ट्रियकरण गर्ने प्रतिबद्धता पनि घोषणापत्रमा समेटिएको छ । मतदातालाई उम्मेदवार अस्वीकार गर्ने अधिकार दिन ‘नो भोट’को विकल्प उपलब्ध गराउने प्रस्तावसमेत गरिएको छ ।

आर्थिक तथा सामाजिक क्षेत्रका लागि पार्टीले महत्त्वाकाङ्क्षी लक्ष्य सार्वजनिक गरेको छ । सन् २०३० सम्म वार्षिक ९ प्रतिशत आर्थिक वृद्धि हासिल गर्ने र हरेक वर्ष ९ लाख रोजगारी सिर्जना गर्ने योजना प्रस्तुत गरिएको छ । ‘उज्यालो नेपाल’ अभियानअन्तर्गत प्रत्येक घरपरिवारलाई जलविद्युत् आयोजनामा कम्तीमा १ हजार कित्ता सेयर प्राथमिक मूल्यमै उपलब्ध गराउने बाचा गरिएको छ ।

यसैगरी, विश्वविद्यालय तहसम्म निःशुल्क शिक्षा र तोकिएका स्वास्थ्य संस्थामा निःशुल्क उपचारको व्यवस्था गर्ने, साथै ‘कमाउँदै पढ्दै’ नीतिअन्तर्गत विद्यार्थीलाई इन्टर्नसिपको अवसर प्रदान गर्ने प्रतिबद्धता पनि पार्टीले जनाएको छ ।