एसईई परीक्षा चैत १९ देखि सञ्चालन हुने

काठमाडौं । राष्ट्रिय परीक्षा बोर्ड, सानोठिमी भक्तपुरले यस वर्षको माध्यमिक शिक्षा परीक्षा (एसईई) चैत १९ गतेदेखि २९ गतेसम्म सञ्चालन गर्ने निर्णय गरेको छ । बोर्डले आज औपचारिक रूपमा परीक्षा तालिका सार्वजनिक गरेको हो ।

यस पटक एसईई परीक्षाका लागि करिब ५ लाख १७ हजार विद्यार्थीले परीक्षा फारम भरेका छन् । यसअघि चैतको पहिलो साताबाट परीक्षा सञ्चालन हुँदै आएको भए पनि २१ फागुनमा तय प्रतिनिधिसभा निर्वाचनका कारण परीक्षा केही दिन पछि सारिएको बोर्डले जनाएको छ ।

निर्वाचनका लागि मतपत्र र एसईई परीक्षाका प्रश्नपत्र जनक शिक्षा सामग्री केन्द्रबाटै छपाइ हुने भएकाले तालिकामा परिमार्जन गर्नुपरेको बोर्डको स्पष्टिकरण छ । बोर्डका अनुसार दुवै कार्य एकै समयमा व्यवस्थापन गर्न कठिन हुने भएकाले परीक्षा मिति परिवर्तन गरिएको हो ।