‘मनोनयनमा तडकभडक निषेध, उल्लङ्घन गरे कडा कारबाही हुन्छ”

काठमाडौं । निर्वाचन आयोगका प्रमुख कार्यवाहक निर्वाचन आयुक्त रामप्रसाद भण्डारीले उम्मेदवारी मनोनयनका क्रममा बाजागाजा, जुलुस तथा अन्य तडकभडकपूर्ण गतिविधि नगर्न राजनीतिक दल र उम्मेदवारहरूलाई कडा चेतावनी दिएका छन् ।

सोमबार आयोग परिसरमा सञ्चारकर्मीहरूसँग कुरा गर्दै भण्डारीले मनोनयन दर्ता गराउँदा देखिने अनावश्यक प्रदर्शन कानुन र निर्वाचन आचारसंहिताले पूर्ण रूपमा निषेध गरेको स्पष्ट पारे । उनले त्यस्ता गतिविधिमा संलग्न हुनेविरुद्ध आयोग कठोर निर्णय लिन पछि नहट्ने बताए ।

“उम्मेदवारी कायम गर्न जाँदा बाजागाजा, भीडभाड र तडकभडक गर्ने अभ्यास देखिन्छ, तर यो कानुन र आचारसंहिता दुवैले निषेध गरेको विषय हो,” भण्डारीले भने, “यसको उल्लङ्घन गर्नेहरूमाथि आयोगले कडाइका साथ कारबाही गर्छ ।”

उनले सबै उम्मेदवार र दलहरूलाई निष्ठापूर्वक आचारसंहिताको पालना गर्दै शान्त र मर्यादित रूपमा मनोनयन पत्र दाखिल गर्न आग्रह गरे । आचारसंहिता पालनाले मात्र निर्वाचनप्रति जनविश्वास मजबुत हुने उनको भनाइ थियो ।

कार्यवाहक आयुक्त भण्डारीले आगामी निर्वाचन स्वच्छ, स्वतन्त्र, निष्पक्ष र भयमुक्त वातावरणमा सम्पन्न हुने दाबीसमेत गरे । उनले देशभित्र मात्र नभई विदेशमा रहेका नेपाली तथा अन्तर्राष्ट्रिय समुदायले पनि नेपालको निर्वाचन प्रक्रियालाई नजिकबाट हेरिरहेकाले सबैले जिम्मेवार भूमिका खेल्नुपर्नेमा जोड दिए ।

“आचारसंहिताले निषेध गरेका कार्यहरू नगरी मनोनयन प्रक्रियामा सहभागी भएमा यो निर्वाचनप्रति कुनै शंका–उपशंका रहँदैन,” भण्डारीले भने, “सबै सरोकारवालाको सहयोगले लोकतान्त्रिक अभ्यास थप विश्वसनीय बन्छ ।”