सफल वार्तापछि मेलम्चीको पानी आजदेखि पुनः काठमाडौंमा पथान्तरण हुने

सिन्धुपाल्चोक । एक सातादेखि अवरुद्ध रहेको मेलम्ची खानेपानी आयोजनाको पानी आज (बुधबार) देखि पुनः काठमाडौंमा पथान्तरण हुने भएको छ । आन्दोलनरत स्थानीय पीडित र सरकारले गएराति गरेको वार्ता सफल भएपछि आयोजना पुनः सञ्चालनमा आउन लागेको हो ।

आन्दोलनरत पीडित र सरकारबीच गएराति भएको वार्ता सफल भएपछि अवरोध हटाइएको हो । कात्तिक २० गतेदेखि मेलम्ची खानेपानी आयोजनाको मुहान अम्बाथानमा नै पुगेर मागहरू पूरा नभएको भन्दै पीडितले पानी पथान्तरण रोकेर आन्दोलन थालेका थिए ।

वार्तामा शहरी विकास, ऊर्जा तथा जलस्रोत तथा सिँचाइ मन्त्रालय र भौतिक पूर्वाधार मन्त्रालयको जिम्मेवारी सम्हालिरहेका मन्त्री कुलमान घिसिङ स्वयम् उपस्थित थिए । उनको संयोजनमा भएको वार्तामा खानेपानी मन्त्रालय, मेलम्ची खानेपानी विकास समिति, सडक विभागका प्रतिनिधिहरू र स्थानीय पीडितहरूबीच सहमति जुटेको हो ।

सहमति अनुसार, २०७८ असारमा आएको विनाशकारी बाढीले क्षति पुर्याएका भौतिक संरचना तथा व्यक्तिगत सम्पत्तिको वास्तविक मूल्यांकन जिल्ला विपद् व्यवस्थापन समितिमार्फत तीन महिनाभित्र गर्न गराइनेछ । मूल्यांकनमा पीडित पक्षका तीन जना प्रतिनिधि समेत रहनेछन् ।

त्यस्तै, मेलम्ची खानेपानी आयोजनाबाट वितरण हुने लेबी (शुल्क) सम्बन्धी प्रस्ताव ४५ दिनभित्र मन्त्रिपरिषदमा पेश गरिनेछ । मेलम्ची–हेलम्बु एकीकृत विकास कार्यक्रम आगामी आर्थिक वर्षदेखि सुरु गर्ने सहमति पनि वार्तामा भएको छ । खानेपानीको मुहानसम्म पुग्ने सडकका लागि यसअघि २५ करोड रुपैयाँ मात्र विनियोजन गरिएकोमा अब त्यसलाई बढाएर १ अर्ब रुपैयाँको बजेटसहित बहुवर्षीय ठेक्काबाट निर्माण गर्ने सहमति भएको छ ।

सहमति पत्रमा हस्ताक्षर भएपछि आन्दोलनरत स्थानीयहरूले मुहान क्षेत्र खुला गर्ने निर्णय गरेका छन् । यससँगै आजदेखि मेलम्चीको पानी पुनः काठमाडौंमा पथान्तरण गरिनेछ ।

सरकारले सहमति कार्यान्वयनका लागि आवश्यक प्रक्रिया तुरुन्त अघि बढाउने प्रतिबद्धता जनाएको छ, भने स्थानीयहरूले पनि मेलम्ची आयोजनालाई अब सहज रूपमा सञ्चालन गर्न सहयोग गर्ने जनाएका छन् ।